اۆتوبۋس شاحتاعا قۇلاپ كەتتى: مايقايىڭدا سوڭعى قۇتقارۋشىنىڭ دەنەسى تابىلدى

فوتو: اشىق دەرەككوز

مايقايىڭدا سوڭعى قۇتقارۋشىنىڭ دەنەسى تابىلدى – دەپ حابارلايدى Massaget.kz ءتىلشىسى. بۇل تۋرالى پاۆلودار وبلىسىنىڭ اكىمى اسايىن بايحانوۆ حابارلادى.

«بۇگىن ساعات 16.20-دا «مايقايىڭ-التىن» اق تاۋ-كەن اۋدانىنداعى وپىرىلعان جەردە ىزدەستىرۋ جۇمىستارىن جۇرگىزۋ كەزىندە سوڭعى قۇتقارۋشى – جۇرگىزۋشى ايىپ تىلەۋبەرگەنوۆتىڭ دەنەسى تابىلدى. قۇتقارۋشىنىڭ دەنەسى جوعارى كوتەرىلىپ, ساراپتاما جۇرگىزۋ ءۇشىن جەدەل-تەرگەۋ توبىنا بەرىلدى», – دەپ جازدى ءوڭىر اكىمى جەلىدەگى پاراقشاسىندا.

4 قاڭتار كۇنى مايقايىڭ كەنىشىنىڭ جانىندا جۇمىس ىستەمەيتىن شاحتانىڭ تازارتۋ كەڭىستىگىنە «كااقق روش» جشس قۇتقارۋشىلارى وتىرعان اۆتوبۋس قۇلاپ كەتكەن بولاتىن. وسى قايعىلى وقيعادان كەيىن 7 اي ۋاقىت ءوتتى.

«وسى ۋاقىت ىشىندە, قازا بولعان جانداردىڭ تۋىستارى سياقتى, ءبىز دە جوعالعان قۇتقارۋشىلاردى تابامىز دەگەن ۇمىتتە بولدىق. ايىپ تىلەۋبەرگەنوۆتىڭ تۋىستارى مەن جاقىندارىنا كوڭىل ايتامىن. مارقۇمعا يمان بايلىعىن بەرسىن. جوعالعان ادامداردى تابۋ ءۇشىن كۇندىز-ءتۇنى جۇمىس ىستەگەن بارلىق جانعا العىس ايتامىن. وكىنىشكە قاراي, ادامداردى قۇتقارۋعا دەگەن ءۇمىت قايعىعا الماستى», – دەدى بايحانوۆ.

ىزدەستىرۋ جۇمىستارىنا ءار ءتۇرلى ماماندار مەن ساراپشىلار, تاۋ-كەن ءىسىنىڭ ارداگەرلەرى, كينولوگتار, ارنايى تەحنيكا مەن دروندار تارتىلدى, ءوڭىردىڭ بارلىق اۆاريالىق-قۇتقارۋ قىزمەتتەرى جۇمىلدىرىلدى.