«اۆتوبۋسقا اقشا جوق»: ءانشى نۇربولات قاناي قيىن ساتتە كىم كومەكتەسكەنىن ايتتى

فوتو: الەۋمەتتىك جەلى

ءانشى نۇربولات قاناي العاشقى كونتسەرتىن بەرگەن جىلداردى ەسىنە الدى. ءانشى قاراجات جاعىنان قاتتى قينالعانىن اشىق ايتتى, دەپ حابارلايدى Qandastar.kz اقپاراتتىق پورتالى nur.kz-كە سىلتەمە جاساپ.

بىرىگىپ دۋەت جازعان وتاندىق انشىلەر قاناي مەن ەركەش حاسەن قىزىق Live ستۋدياسىنا قوناققا كەلىپ, شىعارماشىلىق جولىنداعى جوسپارلارىن ورتاعا سالدى. ستۋديادا قوس ءانشى «حانشايىم» اتتى جاڭا ءانىنىڭ تۇساۋىن كەسىپ, العاش رەت ساحنادا ەكىنشى دۋەتىن شىرقادى.

«بۇيىرسا ەكەۋىمىز بىرگە گاسترولگە شىعايىن دەپ جاتىرمىز. ءالى ناقتى كۇندەرى بەلگىسىز. قۇرمەتتى قازاقستاندىقتار, بۇيىرسا ەكەۋىمىز سىزدەردىڭ قالالارىڭىزعا كونتسەرتپەن بارىپ قالامىز. سول كەزدە كەلىڭىزدەر», — دەيدى ەركەش حاسەن.

ودان بولەك ەفير كەزىندە نۇربولات قاناي العاشقى كونتسەرتىن بەرگەن كەزىن ەسكە الىپ, قانداي قيىندىقتاردى باستان كەشىرگەنىن ايتىپ بەردى. ول سول كەزدە قارجىلاي كومەك كورسەتكەن باعدارلاما جۇرگىزۋشىسى مارات ورالعازينگە العىس ايتتى.

«مارات, اعا سىزگە كوپ-كوپ راقمەت! ءسىزدىڭ ەڭ بىرىنشە, ەڭ العاشقى كونتسەرتىمە قولداۋ كورسەتكەنىڭىزگە راقمەت, اللا رازى بولسىن! ول كەزدە مەن اتوبۋسقا اقشا جوق, جاياۋ جۇرەتىنمىن. كونتسەرت بەرەتىن كەزدە جەتپەي جاتقان اقشانى بەرگەن سىزگە العىسىم زور», — دەدى ول.