اياگوز قالاسىنداعى مەكتەپتە تولقىن زابيروۆا اتىنداعى كابينەت اشىلدى

اباي وبلىسى اياگوز قالاسىنداعى مەكتەپتەردىڭ بىرىندە  انشى  تولقىن زابيروۆا اتىنداعى كابينەت اشىلدى.  بۇلل تۋرالى ونەر يەسى جەلدەگى پاراقشاسىندا ءمالىم ەتتى, دەپ حابارلايدى Qandastar.kz اقپارات پورتالى.

ول ەرەكشە قۇرمەت ءۇشىن اياگوز قالاسىنىڭ اكىمىنە ەرەكشە العىسىن ءبىلدىردى.

 «اياگوز – مەنىڭ العاشقى ارمانىم باستالعان جەر…

بۇگىن مەن ءۇشىن ەرەكشە ءارى تولعانىسقا تولى كۇن بولدى. سەبەبى مەن ءوزىم العاش رەت 1-سىنىپقا بارعان اياگوز قالاسىنداعى №1 مەكتەبىنە قايتا ورالدىم. وسى مەكتەپتىڭ تابالدىرىعىن اتتاپ, العاش رەت قالام ۇستاپ, “الىپپەمەن” تانىسقان ساتتەرىم كۇنى بۇگىنگە دەيىن جۇرەگىمدە ساقتالىپ كەلەدى. بۇل جەردە مەن بار بولعانى ءبىر جىل عانا وقىدىم, بىراق ول ۋاقىت مەن ءۇشىن — ءومىرىمنىڭ ەڭ قىمبات كەزەڭدەرىنىڭ ءبىرى.

بۇگىندە ءدال وسى مەكتەپتىڭ ىشىندە مەنىڭ اتىممەن اتالعان ارنايى كابينەتتىڭ بارىن كورۋ — مەن ءۇشىن زور قۇرمەت پەن ەرەكشە جاۋاپكەرشىلىك. تاعى ءبىر قۋانىشتى جاڭالىق — مەكتەپ قابىرعاسىنان مەنىڭ شىعارماشىلىق جولىمدى بەينەلەيتىن ارنايى ستەند ورناتىلىپتى. وندا مەنىڭ ماراپاتتارىم, فوتوسۋرەتتەرىم, ديپلومدارىم ءىلىنىپ تۇر.

وسىنداي ەرەكشە قۇرمەت كورسەتكەن مەكتەپ ۇجىمىنا, اياگوز حالقىنا, ءبىلىم ورداسىنىڭ باسشىلىعىنا جانە وسى يگى باستامانى قولداعان اياگوز قالاسىنىڭ اكىمىنە ەرەكشە العىسىمدى بىلدىرەمىن! بۇل – مەن ءۇشىن شىن مانىندە ۇلكەن مارتەبە.

ءبىلىم – ادام ومىرىندەگى ەڭ ماڭىزدى نەگىزدەردىڭ ءبىرى. سول العاشقى ارىپتەر مەن ۇيرەنگەن ساباقتارسىز بۇگىنگى مەن بولماس ەدىم. سوندىقتان ءار بالانىڭ جۇرەگىنە ءۇمىت پەن سەنىم ۇيالاتاتىن ۇستازدارعا مىڭ العىس!», — دەپ جازدى ءانشى.