Aıagóz qalasyndaǵy mektepte Tolqyn Zabırova atyndaǵy kabınet ashyldy

Abaı oblysy Aıagóz qalasyndaǵy mektepterdiń birinde  ánshi  Tolqyn Zabırova atyndaǵy kabınet ashyldy.  Bull týraly óner ıesi jeldegi paraqshasynda málim etti, dep habarlaıdy Qandastar.kz aqparat portaly.

Ol erekshe qurmet úshin Aıagóz qalasynyń ákimine erekshe alǵysyn bildirdi.

 «Aıagóz – meniń alǵashqy armanym bastalǵan jer…

Búgin men úshin erekshe ári tolǵanysqa toly kún boldy. Sebebi men ózim alǵash ret 1-synypqa barǵan Aıagóz qalasyndaǵy №1 mektebine qaıta oraldym. Osy mekteptiń tabaldyryǵyn attap, alǵash ret qalam ustap, “Álippemen” tanysqan sátterim kúni búginge deıin júregimde saqtalyp keledi. Bul jerde men bar bolǵany bir jyl ǵana oqydym, biraq ol ýaqyt men úshin — ómirimniń eń qymbat kezeńderiniń biri.

Búginde dál osy mekteptiń ishinde meniń atymmen atalǵan arnaıy kabınettiń baryn kórý — men úshin zor qurmet pen erekshe jaýapkershilik. Taǵy bir qýanyshty jańalyq — mektep qabyrǵasynan meniń shyǵarmashylyq jolymdy beıneleıtin arnaıy stend ornatylypty. Onda meniń marapattarym, fotosýretterim, dıplomdarym ilinip tur.

Osyndaı erekshe qurmet kórsetken mektep ujymyna, Aıagóz halqyna, bilim ordasynyń basshylyǵyna jáne osy ıgi bastamany qoldaǵan Aıagóz qalasynyń ákimine erekshe alǵysymdy bildiremin! Bul – men úshin shyn máninde úlken mártebe.

Bilim – adam ómirindegi eń mańyzdy negizderdiń biri. Sol alǵashqy áripter men úırengen sabaqtarsyz búgingi men bolmas edim. Sondyqtan ár balanyń júregine úmit pen senim uıalatatyn ustazdarǵa myń alǵys!», — dep jazdy ánshi.