«اياعىنان ايىرىلدى»: استاناداعى اۆتوبۋس اپاتىنان زارداپ شەككەندەردىڭ جاعدايى بەلگىلى بولدى

ەلوردادا جولاۋشىلار اۆتوبۋسىنىڭ اپاتقا ۇشىراۋى سالدارىنان ءبىر ادام اياعىنان ايىرىلدى, دەپ حابارلايدى Qandastar.kz اقپارات پورتالى BAQ.KZ-كە سىلتەمە جاساپ.

بۇل تۋرالى استانا قالاسىنىڭ قوعامدىق دەنساۋلىق ساقتاۋ باسقارماسى مالىمدەدى.

جەدەل مەديتسينالىق جاردەم بريگادالارى قالا ستاتسيونارلارىنا بارلىعى 15 ادامدى جەتكىزدى. ولاردىڭ ۇشەۋى اۋرۋحاناعا جاتقىزىلدى. قالعاندارى ۇيگە جىبەرىلدى, — دەپ جاۋاپ بەردى باسقارما رەداكتسيانىڭ ساۋالىنا.

بەلگىلى بولعانداي, اۋرۋحاناعا جاتقىزىلعانداردىڭ جاعدايى تۇراقتى اۋىر جانە وتە اۋىر دەپ باعالانادى.

ءبىر پاتسيەنتكە تومەنگى اياقتىڭ امپۋتاتسياسى جاسالدى. بارلىق زارداپ شەككەندەرگە قاجەتتى مەديتسينالىق كومەك تولىق كولەمدە كورسەتىلەدى, — دەدى ۆەدومستۆودان.

ەسكە سالايىق, كەشە كەشكىسىن استانادا رەسپۋبليكا داڭعىلىنىڭ بويىندا قالا ىشىندە جۇرەتىن جولاۋشىلار اۆتوبۋسى جول اپاتىنا ۇشىرادى. الدىن الا دەرەكتەرگە سۇيەنسەك, اۆتوبۋس جۇرگىزۋشىسى مانەۆر جاساۋ كەزىندە ءرۋلدى باسقارا الماي, باعانعا سوعىلعان.

اتالعان اۆتوبۋس اپاتىنان زارداپ شەگۋشىلەردىڭ ءبىرىنىڭ جاعدايى اۋىر ەكەنى دە حابارلانعان بولاتىن.