اياق-قول, اۋىزدارىن سكوتچتاپ, سىردارياعا اعىزىپ جىبەرگەن: تۇركىستان وبلىسىندا جيەنى مەن جەزدەسىن ولتىرگەن اعايىندىلارعا ۇكىم شىقتى

تۇركىستان وبلىسىندا جيەنى مەن جەزدەسىن ۇرلاپ, ءولتىرىپ, دەنەسىن سىرداريا وزەنىنە باتىرىپ جىبەرگەن اعايىندى ەكى تۇرعىنعا ۇكىم شىعارىلدى, دەپ حابارلايدى Qandastar.kz اقپارات پورتالى وتىرار ارناسىنا سىلتەمە جاساپ.

ولاردىڭ بىرىنە 23 جىل, ەكىنشىسىنە 24 جىل 6 اي تۇرمە جازاسى كەسىلدى.

تۇركىستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ قاتىسۋىمەن اسا اۋىر قىلمىس جاساعان اعايىندى جىگىتتىڭ ءىسىن قاراپ ءبىتتى. سوتتالۋشىلار الدىن الا ءسوز بايلاسىپ جيەنى مەن جەزدەسىن ۇرلاپ, باس بوستاندىعىنان زاڭسىز ايىرعان. سودان كەيىن ءولتىرىپ, دەنەسىن وزەنگە باتىرىپ جىبەرگەن.

«5 تامىز 2024 جىلى تۇنگى ۋاقىتتا سوتتالۋشىلار تۇركىستان وبلىسى شاردارا قالاسىنىڭ ماڭىندا سىرداريا وزەنىنىڭ جاعاسىندا ادامدار توبىنىڭ الدىن الا ءسوز بايلاسۋى ارقىلى جابىرلەنۋشىلەردى كۇش كورسەتىپ, باس بوستاندىعىنان ايىرعان. اياق-قولىن, كوزىن, اۋزىن جانە تىنىس الۋ جولدارىن سكوتچ ارقىلى بايلاپ, كەۋدە تۇستارىنان بىرنەشە رەت سوققى جاساعان. ناتيجەسىندە العان جاراقاتتاردان جابىرلەنۋشىلەر قايتىس بولعان. سوتتالۋشىلار قىلمىستارىن جاسىرۋ ماقساتىندا جابىرلەنۋشىلەردىڭ مايىتتەرىن وزەنگە اعىزىپ جىبەرگەن».

تۇركىستان وبلىستىق سوتىنىڭ ءباسپاسوز قىزمەتى: «اپكەسى سول ەكى ىنىسىنە بەتتەستىرۋ كەزىندە بارىپ سويلەسكەننەن كەيىن, اپكەسى ول سوزدەردى كوتەرە الماي ول كىسى دە قازا تابادى. ياعني, ءبىر ۇيدەن ءۇش ادامنىڭ قازاسى».

ايىپتالۋشىلار قىلمىستىق كودەكستىڭ «ادامدى ۇرلاۋ» بابى, «باس بوستاندىعىنان زاڭسىز ايىرۋ» بابى جانە «ادام ءولتىرۋ» بابىمەن كىنالى دەپ تانىلدى. شەشىمدى القابيلەر شىعارعان. جاساعان قىلمىستارىنىڭ جيىنتىعى بويىنشا سوتتالۋشىلاردىڭ ءبىرى – 24 جىل 6 اي مەرزىمگە, ەكىنشىسى 23 جىلعا باس بوستاندىعىنان ايىرىلعان.

«جابىرلەنۋشىنىڭ ازاماتتىق تالاپ قويۋ ارىزى ءىشىنارا قاناعاتتاندىرىلدى. سوتتالۋشىلاردان ورتاق تارتىپتە مورالدىق زيان 30 ميلليون تەڭگە, ادۆوكاتقا تولەنگەن 2.4 ميلليون تەڭگە ءوندىرىلدى».

ايتا كەتەيىك, ۇكىم 10 ماۋسىم كۇنى شىققان جانە زاڭدى كۇشىنە ەنبەگەن.