Aıaq-qol, aýyzdaryn skotchtap, Syrdarııaǵa aǵyzyp jibergen: Túrkistan oblysynda jıeni men jezdesin óltirgen aǵaıyndylarǵa úkim shyqty

Túrkistan oblysynda jıeni men jezdesin urlap, óltirip, denesin Syrdarııa ózenine batyryp jibergen aǵaıyndy eki turǵynǵa úkim shyǵaryldy, dep habarlaıdy Qandastar.kz aqparat portaly Otyrar arnasyna silteme jasap.

Olardyń birine 23 jyl, ekinshisine 24 jyl 6 aı túrme jazasy kesildi.

Túrkistan oblystyq qylmystyq ister jónindegi mamandandyrylǵan aýdanaralyq soty alqabılerdiń qatysýymen asa aýyr qylmys jasaǵan aǵaıyndy jigittiń isin qarap bitti. Sottalýshylar aldyn ala sóz baılasyp jıeni men jezdesin urlap, bas bostandyǵynan zańsyz aıyrǵan. Sodan keıin óltirip, denesin ózenge batyryp jibergen.

«5 tamyz 2024 jyly túngi ýaqytta sottalýshylar Túrkistan oblysy Shardara qalasynyń mańynda Syrdarııa ózeniniń jaǵasynda adamdar tobynyń aldyn ala sóz baılasýy arqyly jábirlenýshilerdi kúsh kórsetip, bas bostandyǵynan aıyrǵan. Aıaq-qolyn, kózin, aýzyn jáne tynys alý joldaryn skotch arqyly baılap, keýde tustarynan birneshe ret soqqy jasaǵan. Nátıjesinde alǵan jaraqattardan jábirlenýshiler qaıtys bolǵan. Sottalýshylar qylmystaryn jasyrý maqsatynda jábirlenýshilerdiń máıitterin ózenge aǵyzyp jibergen».

Túrkistan oblystyq sotynyń baspasóz qyzmeti: «Ápkesi sol eki inisine bettestirý kezinde baryp sóıleskennen keıin, ápkesi ol sózderdi kótere almaı ol kisi de qaza tabady. Iaǵnı, bir úıden úsh adamnyń qazasy».

Aıyptalýshylar Qylmystyq kodekstiń «Adamdy urlaý» baby, «Bas bostandyǵynan zańsyz aıyrý» baby jáne «Adam óltirý» babymen kináli dep tanyldy. Sheshimdi alqabıler shyǵarǵan. Jasaǵan qylmystarynyń jıyntyǵy boıynsha sottalýshylardyń biri – 24 jyl 6 aı merzimge, ekinshisi 23 jylǵa bas bostandyǵynan aıyrylǵan.

«Jábirlenýshiniń azamattyq talap qoıý aryzy ishinara qanaǵattandyryldy. Sottalýshylardan ortaq tártipte moraldyq zııan 30 mıllıon teńge, advokatqa tólengen 2.4 mıllıon teńge óndirildi».

Aıta keteıik, úkim 10 maýsym kúni shyqqan jáne zańdy kúshine enbegen.