ازاماتتاردىڭ تابىسى قىمباتشىلىقتىڭ ارتىنان قۋىپ جەتە الماي كەلە جاتىر – ەكونوميست

فوتو: ۆيدەودان كادر

بەلگىلى ەكونوميست ماقسات حالىق Qasqa Jol يۋتۋب-ارناسىندا قوناقتا بولىپ, ەل ەكونوميكاسىندا بولىپ جاتقان ءبىراز دۇنيەننىڭ بەتىن اشتى, دەپ حابارلايدى Skifnews.kz اقپارات پورتالى.

ەكونميستىڭ ايتۋىنشا, ەل حالقىنىڭ ماتەريالدىق جاعدايى كۇن وتكەن سايىن تومەندەپ, ازاماتتار كەدەيلەنىپ بارا جاتىر.

قازاقستاننىڭ حالقى – كەدەي, ءوزى – باي ەل. بۇل تىركەس بۇگىنگى كۇننىڭ اقيقاتى بولىپ وتىر. بىراق حالىقتىڭ كەدەيلىگىن ۇكىمەت مويىنداعىسى كەلمەيدى. ەلىمىزدى ورتا دەرجاۆاداعى مەملەكەت دەپ اتايدى. بۇلاي ايتۋى يدەولوگيالىق تۇرعىدا دۇرىس شىعار. ال حالىقتىڭ ءومىر ساپاسىنا قارايتىن بولساق, ازاماتتارىمىزدىڭ تولەم قابىلەتى جىل سايىن ناشارلاپ جاتقانىن بايقايمىز. وسىدان 1-2 جىل بۇرىن جالاقىعا ءبىر دۇنيە ساتىپ الا الاتىن بولسا, قازىر جالاقىلارىنا دۇرىس كۇن كورە المايدى. حالىقتىڭ قازىرگى جاعدايى وسىنداي. ودان كەيىن جۇمىسپەن قامتۋ ماسەلەسى دە ءالى ءبىر جولعا قويىلعان جوق. جۇمىسسىزداردىڭ سانى ۇكىمەت ەسەبى بويىنشا ءبىر باسقا, ناقتى جۇمىسسىزدار سانى ءبىر باسقا. ستاتيستيكادا جۇمىسسىزداردى 5% دەپ كورسەتەدى, ال پرەزيدەنتىمىز 9% دەپ ايتتى. سوندا پرەزيدەنتتىڭ ءوزى ستاتيستيكاعا كۇمانمەن قاراپ وتىر. سول ءۇشىن رەالدى تۇردە جۇمىسسىزداردىڭ سانىن ناقتى انىقتاپ الۋ كەرەك. ويتكەنى جۇمىسپەن قامتۋ ورتالىقتارىنا بارىپ تىركەلمەگەندەردىڭ سانى قانشاما. شەندىلەر ەسەپ بەرگەندە حالىقتىڭ تابىسى ارتىپ جاتقانىن ايتادى. بىراق ول – اتاۋلى جالاقى. ال ناقتى جالاقى ءسىز وتكەن جىلى العان 300-400 مىڭ تەڭگە اقشاڭىزبەن وسى جىلى قانداي دا ءبىر زاتتار الا الاسىز با دەگەن ناقتىلىقتى كورسەتەدى. 5%-عا ايلىقتىڭ وسكەنىن كورەمىز, ال ازىق-ت ۇلىك بۇل رەتتە 10%-عا ءوسىپ جاتىر. بەيرەسمي ستاتيستيكادا بۇل ءوسىم ودان دا كوپ. ازاماتتاردىڭ تابىسى قىمباتشىلىقتىڭ ارتىنان قۋىپ جەتە الماي كەلە جاتىر, – دەدى ماقسات حالىق.