جاڭالىقتار
ازيا دامۋ بانكى قىزىلوردا – جەزقازعان اۆتوجولىن سالۋعا قارجى بولەدى
فوتو: اشىق دەرەككوز
مەملەكەت باسشىسى ازيا دامۋ بانكىنىڭ پرەزيدەنتى ماساتسۋگۋ اساكاۆانى قابىلدادى. كەزدەسۋدە ماساتسۋگۋ اساكاۆا قازاقستانمەن تىعىز ىنتىماقتاستىقتى جالعاستىرىپ, ءىرى جوبالار جاساۋعا دايىن ەكەنىن جەتكىزدى, دەپ جازادى qandastar.kz
اقوردانىڭ مالىمەتىنشە, ازيا دامۋ بانكىنىڭ پرەزيدەنتى استاناعا ازيا وڭىرلىك ەكونوميكالىق ىنتىماقتاستىعى باعدارلاماسىنىڭ 23-ءشى مينيسترلىك كونفەرەنتسياسىنا قاتىسۋ ءۇشىن كەلگەن.
“مەملەكەت باسشىسى مارتەبەلى مەيماندى قازاقستان مەن ازيا دامۋ بانكىنىڭ ناتيجەلى قارىم-قاتىناسىنىڭ 30 جىلدىعىمەن قۇتتىقتادى. قاسىم-جومارت توقاەۆ ەلىمىز قارجى ينستيتۋتىمەن ءوزارا ىقپالداستىقتىڭ ستراتەگيالىق سيپاتىن, سونداي-اق بانكتىڭ ءىرى ينفراقۇرىلىمدىق جوبالاردى جۇزەگە اسىرۋعا جانە ۇلتتىق قارجى جۇيەسىن نىعايتۋعا قوسقان ۇلەسىن جوعارى باعالايتىنىن ايتتى”, – دەلىنگەن حابارلامادا.
دەرەكتەرگە سۇيەنسەك, ازيا دامۋ بانكى 1994-2024 جىلدار ارالىعىندا قازاقستاندا جالپى سوماسى 7 ميلليارد دوللارعا جۋىق جوبالاردى قارجىلاندىردى. اتاپ ايتقاندا, بانك باتىس قىتاي – باتىس ەۋروپا حالىقارالىق كولىك ءدالىزىن سالۋعا, سونداي-اق اقتوبە – قاندىاعاش جولىن قايتا جوندەۋگە قاتىسقان.
“مەملەكەت باسشىسى قازاقستاندا ەكونوميكانى ىرىقتاندىرۋ, ينۆەستيتسيالىق احۋالدى جاقسارتۋ جانە ەلىمىزدىڭ ەكونوميكالىق الەۋەتىن ارتتىرۋ ءۇشىن قاجەتتى جاعداي جاساۋ جۇمىستارى جالعاسىپ جاتقانىن جەتكىزدى. قاسىم-جومارت توقاەۆ ەكونوميكانى دەكاربونيزاتسيالاۋ ءوزارا ءىس-قيمىلدىڭ پەرسپەكتيۆتى سالالارىنىڭ ءبىرى ەكەنىنە توقتالدى.
ال ماساتسۋگۋ اساكاۆا ەلىمىزدىڭ ەكونوميكالىق رەفورمالارى مەن ورنىقتى دامۋ جولىنداعى تابىسىن وڭ باعالادى. سونىمەن قاتار بانكتىڭ قازاقستانمەن تىعىز ىنتىماقتاستىقتى جالعاستىرۋعا, سونىڭ ىشىندە ينفراقۇرىلىمدى جاڭعىرتۋ, الەۋمەتتىك سالانى جەتىلدىرۋ جانە ينۆەستيتسيالىق احۋالدى نىعايتۋ باعىتىنداعى ءىرى جوبالارعا قاتىسۋعا دايىن ەكەنىن راستادى”, – دەلىنگەن حابارلامادا.
ازيا دامۋ بانكى پرەزيدەنتىنىڭ ساپارى اياسىندا جالپى قۇنى 300 ميلليون دوللاردان اساتىن «قىزىلوردا – جەزقازعان» اۆتوجولىنىڭ قۇرىلىسىن قارجىلاندىرۋ تۋرالى كەلىسىمگە قول قويۋ جوسپارلانىپ وتىر.
