جاڭالىقتار
«باعانى ادەيى تومەندەتەدى»: بەلگىلى كاسىپكەر «ياندەكس.تاكسي» باسەكەلەستەرىنە قازاقستان نارىعىنا شىعۋ نەگە قيىن ەكەنىن ايتتى
فوتو: depositphotos.com
İnDrive كومپانياسىنىڭ نەگىزىن قالاۋشى ارسەن تومسكي ياندەكس جاڭا ويىنشىلاردى قازاقستانداعى تاكسي نارىعىنان قالاي ىعىستىراتىنىن ايتىپ بەردى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ول جاڭا سەرۆيستەردىڭ قازاقستان نارىعىنا كىرۋى نەگە قيىن ەكەنىن ءتۇسىندىرىپ, باسەكەلەستىككە كەدەرگى كەلتىرەتىن فاكتورلاردى اتادى.
“Bolt پەن Didi-گە قازاقستان نارىعىنا شىعۋ نەگە قيىن? نارىقتا جاڭا كومپانيا پايدا بولسا, ياندەكس Go نەمەسە Uber KZ باعالاردى كۇرت تومەندەتىپ, جۇرگىزۋشىگە بەرىلەتىن سىي-سياپاتتى ارتتىرىپ, وزدەرىنە بايلاپ قويادى. بۇل جاعداي جاڭا ويىنشىعا قيىن سوعارى ءسوزسىز. سول سەبەپتى نارىقتان كەتۋگە تۋرا كەلەدى. كەيىن شىعىندارىن قايتارۋ ءۇشىن ياندەكس باعالاردى بۇرىنعىدان دا جوعارى قويۋى مۇمكىن. مۇنداي تاكتيكا ۇستەم كومپانيا تاراپىنان “predatory pricing” ياعني باعانى تومەندەتۋ ساياساتى دەپ قابىلدانادى. بۇل كوپتەگەن ەلدەردە, سونىڭ ىشىندە قازاقستاندا دا, باسەكەلەستىكتى قورعاۋ زاڭناماسىنا قايشى. بىراق ونىڭ ورىندالۋىن قاداعالاۋ كەرەك”, – دەپ جازدى تومسكي.
ونىڭ ايتۋىنشا, ءىرى ويىنشى تەك باعانى تومەندەتۋ ساياساتىن عانا ەمەس, باسقا دا تەتىكتەردى پايدالانادى.
“سونىمەن قاتار مونوپوليانى ساقتاپ قالۋدىڭ باسقا جولدارىن دا قولدانۋى مۇمكىن. مىسالى, قوسىلعان تاكسوپاركتەرگە جاڭا سەرۆيسپەن جۇمىس ىستەۋگە تىيىم سالىنادى. ال ۇلكەن كومپانيالار وزدەرىنىڭ كارتالارىن قولدانۋعا مۇمكىندىك بەرمەيدى. قازاقستانداعى Google Maps ساپاسى وتە تومەن. سايكەسىنشە بۇل دا نارىقتان كەتۋگە اسەر ەتەدى”, – دەدى ول.
ارسەن تومسكي مونوپوليانىڭ حالىق ءۇشىن دە, مەملەكەت ءۇشىن دە زياندى ەكەنىن ايتىپ, بيلىككە ناقتى ۇسىنىس جاسادى.
“جالپى مونوپوليا حالىققا دا, مەملەكەتكە دە زيان, اسىرەسە ول گەوساياسي تاۋەكەلدەرمەن بايلانىستى بولسا. بيلىك شىنايى ءارى ءادىل باسەكەلەستىك ورنايتىنداي جاعداي جاساعانى ءجون, سوندا 2-3 ءىرى سەرۆيس جانە بىرنەشە شاعىن كومپانيا قاتار جۇمىس ىستەي الار ەدى”, – دەيدى تومسكي.
ەسكە سالساق, وسىعان دەيىن «ياندەكس.تاكسي» تاريفتەردىڭ قىمباتتايتىنى تۋرالى ءۇش كۇن بۇرىنحابارلاۋعا مىندەتتەلگەن ەدى.
