Baǵlan Ábdiraıymov Tuńǵyshbaı Jamanqulovqa qıyn kezeńde qoldaý bildirgenin aıtty

Foto: Turkystan.kz

«Jigitter» kvartetiniń ánshisi Baǵlan Ábdiraıymov Tuńǵyshbaı Jamanqulovtyń basyna qıyn jaǵdaı túsken kezdi eske aldy, dep jazady qandastar.kz

Onyń sózinshe, Jamanqulov týraly jazba jarııalaǵan soń oǵan biraz adam habarlasyp, jazbany alyp tastaýyn aıtqan.

«Tuńǵyshbaı aǵamyzdyń basynda qıyndyq bolǵan kezde shákirtteri, áriptesteri, jalpy tanymal adamdar eshqandaı qoldaý bildirgen joq. Men úıde jatyp, Muhtar Shahanovtyń bir óleńin oqyp qaldym. Bir qataryn alyp, Instagram-daǵy paraqshama júktep qoıdym. Astyna «Túıeni túgimen jutyp jatqan kisiler bar. Biz úshin han beınesinde qalyptasyp qalǵan osyndaı tulǵalarymyz basyna is túsip jatqan kezde qoldaý bermeı jatyrmyz» dep jazdym. Qarajat jymqyrdy ma, joq pa?! Oǵan meniń qatysym joq. Biraq eger qarjylaı qoldaý kerek bolsa, osyndaı tulǵalarymyzdyń sózin sóılep, el-jurt bolyp jınap bereıik dep aıttym. Bul jazbamnan keıin birneshe qońyraýlar tústi. Bári jazbamdy óshirip tastaýdy usyndy. Biraq men óshirmedim», – dedi ánshi.