«بايلىعىمىزدى ۇرلاۋعا ىڭعايلى بولسىن دەپ ءبىر قولعا بەرىپ قويدىق»: دەپۋتات «سامۇرىق-قازىنا» قورىنا قارسى شىقتى

ءماجىلىس دەپۋتاتى ءادىل جۇبانوۆ «سامۇرىق-قازىنا» قورىنىڭ جۇمىسىن سىنعا الدى, دەپ حابارلايدى qandastar.kz

19 مامىر كۇنى ماجىلىستە 2024 جىلعى رەسپۋبليكالىق بيۋدجەتتىڭ ورىندالۋى جونىندەگى ۇكىمەت پەن جوعارى اۋديتورلىق پالاتانىڭ ەسەبى تانىستىرىلدى.

تالقىلاۋ بارىسىندا دەپۋتات جۇبانوۆ قازاقستاندىق ۇلتتىق كومپانيالاردا ەشقاشان بيزنەسپەن اينالىسپاعان وتە باي ادامدار جۇمىس ىستەيتىنىن ايتتى.

ء«بىر كۇن بولسىن كاسىپكەرلىكپەن اينالىسپاعان ادامدار بار, بىراق ولار وتە باي, سەبەبى ۇلتتىق كومپانيالاردا جۇمىس ىستەيدى. وتباسىلارىنىڭ بىردە-ءبىر مۇشەسى جەكە بيزنەسپەن اينالىسپاعان, بىراق ءبىز ولاردىڭ وتە باي ەكەنىن بىلەمىز. ءبىز بايلىعىمىزدىڭ ءبارىن ءبىر قولعا بەرىپ قويعان سياقتىمىز – ۇرلاۋعا ىڭعايلى بولسىن دەپ. جالپى, مەن «سامۇرىق-قازىنا» قورىنىڭ قىزمەتىنە قارسىمىن. بۇل قور تاراتىلىپ, باسەكەلى ورتاعا بەرىلۋى ءتيىس. سىزدەردىڭ «سامۇرىق-قازىنا» كومپانياسىنا قاتىستى كوزقاراستارىڭىز قانداي?» – دەپ سۇرادى دەپۋتات جوعارى اۋديتورلىق پالاتا وكىلىنەن.

 Skifnews.kz اقپارات پورتالى جازعانداي,  پالاتا مۇشەسى نۇرلان نۇرجانوۆ «سامۇرىق-قازىنا» قورىنا تەكسەرىس جوسپاردا بار ەكەنىن ايتتى.

«قازىرگى جاعدايدى ەسكەرە وتىرىپ, ءبىز «سامۇرىق-قازىنا» قورىنا اۋديت جۇرگىزەمىز. جوسپارىمىزعا سايكەس, تەكسەرىس شىلدە ايىندا اياقتالادى, سودان كەيىن ءبىز تولىق ەسەپ پەن ۇسىنىستاردى ۇسىنامىز. بۇل ماسەلە ءبىزدى دە قاتتى الاڭداتادى», – دەدى نۇرلان نۇرجانوۆ.