«Baılyǵymyzdy urlaýǵa yńǵaıly bolsyn dep bir qolǵa berip qoıdyq»: depýtat «Samuryq-Qazyna» qoryna qarsy shyqty

Májilis depýtaty Ádil Jubanov «Samuryq-Qazyna» qorynyń jumysyn synǵa aldy, dep habarlaıdy qandastar.kz

19 mamyr kúni májiliste 2024 jylǵy respýblıkalyq bıýdjettiń oryndalýy jónindegi úkimet pen joǵary aýdıtorlyq palatanyń esebi tanystyryldy.

Talqylaý barysynda depýtat Jubanov qazaqstandyq ulttyq kompanııalarda eshqashan bıznespen aınalyspaǵan óte baı adamdar jumys isteıtinin aıtty.

«Bir kún bolsyn kásipkerlikpen aınalyspaǵan adamdar bar, biraq olar óte baı, sebebi ulttyq kompanııalarda jumys isteıdi. Otbasylarynyń birde-bir múshesi jeke bıznespen aınalyspaǵan, biraq biz olardyń óte baı ekenin bilemiz. Biz baılyǵymyzdyń bárin bir qolǵa berip qoıǵan sııaqtymyz – urlaýǵa yńǵaıly bolsyn dep. Jalpy, men «Samuryq-Qazyna» qorynyń qyzmetine qarsymyn. Bul qor taratylyp, básekeli ortaǵa berilýi tıis. Sizderdiń «Samuryq-Qazyna» kompanııasyna qatysty kózqarastaryńyz qandaı?» – dep surady depýtat joǵary aýdıtorlyq palata ókilinen.

 Skifnews.kz aqparat portaly jazǵandaı,  palata múshesi Nurlan Nurjanov «Samuryq-Qazyna» qoryna tekseris josparda bar ekenin aıtty.

«Qazirgi jaǵdaıdy eskere otyryp, biz «Samuryq-Qazyna» qoryna aýdıt júrgizemiz. Josparymyzǵa sáıkes, tekseris shilde aıynda aıaqtalady, sodan keıin biz tolyq esep pen usynystardy usynamyz. Bul másele bizdi de qatty alańdatady», – dedi Nurlan Nurjanov.