باق قىزمەتكەرلەرى باسپانالى بولدى

فوتو: daraqory.kz

بۇقارالىق اقپارات قۇرالدارى قىزمەتكەرلەرى كۇنىنە وراي «دارا» پرەزيدەنتتىك باستامالار قورى قازاقستاننىڭ جەتەكشى مەدياۇيىمدارىنىڭ قىزمەتكەرلەرىنە پرەزيدەنت قاسىم-جومارت توقاەۆتىڭ اتىنان پاتەرگە سەرتيفيكاتتار تابىستادى, دەپ جازدى qandastar.kz

«پرەزيدەنتتىڭ تاپسىرماسىمەن بۇل شارا ءۇشىنشى جىل قاتارىنان وتكىزىلىپ كەلەدى. بۇل – مەملەكەت باسشىسىنىڭ وتاندىق باق قىزمەتكەرلەرىن ۇنەمى قولدايتىنىن كورسەتەدى», – دەدى رۋسلان جەلدىباي.

بيىل تەك جۋرناليستەر عانا ەمەس, سونىمەن قاتار رەجيسسەرلەر, وپەراتورلار, كوررەكتورلار, دۋبلياج رەداكتورلارى, دىبىس رەجيسسەرلەرى, قويۋشىلار جانە ساپالى كونتەنت ازىرلەۋمەن اينالىساتىن وزگە دە ماماندارعا دا باسپانا بۇيىردى.

«الەۋمەتتىك وسال توپتارعا ەرەكشە كوڭىل ءبولىندى: باسپانا الۋشىلار تىزىمىندە كوپبالالى وتباسىلار مەن مۇگەدەك بالالارى بار وتباسىلار بار. ارىپتەستەرىمنىڭ جەتىستىگىنە شىن جۇرەكتەن قۋانىشتىمىن, بارشاڭىزدى شىن جۇرەكتەن قۇتتىقتايمىن», – دەدى ول.

تۇرعىن ءۇي سەرتيفيكاتتارىن «Qazaqstan» تەلەراديوكورپوراتسياسى, «حابار» اگەنتتىگى, Qazcontent, «قازاق گازەتتەرى», «ەۆرازيا+ورت», Atameken Business مەدياحولدينگى, Tengrinews جانە باسقا دا باق وكىلدەرى الدى.

“مەملەكەت باسشىسىنىڭ باستامالارىنىڭ ءبىرى – باق وكىلدەرىن باسپانامەن قامتاماسىز ەتۋ – «دارا» قورىنىڭ تۇراقتى قولداۋىمەن ءساتتى جۇزەگە اسىرىلۋدا. «قوعامعا وڭ اسەر ەتىپ, حالىقتىڭ ءال-اۋقاتىن جاقسارتاتىن جوبالاردى جۇزەگە اسىرۋ – ءبىز ءۇشىن باستى قۇندىلىقتاردىڭ ءبىرى بولىپ قالا بەرەدى”, – دەپ اتاپ ءوتتى «دارا» قورىنىڭ باسشىسى مۇحامەدقالي تاۋان.