باقتيار ارتاەۆ قىزىلوردا وبلىسىندا قىزمەتكە تاعايىندالدى

قىزىلوردا وبلىسىنىڭ اكىمى نۇرلىبەك نالىباەۆتىڭ توراعالىعىمەن الەۋمەتتىك-ەكونوميكالىق كورسەتكىشتەرگە, كادرلىق وزگەرىستەرگە وراي اكتيۆ وتىرىسى ءوتتى. جيىندا ايماق باسشىسى قىزىلوردا وبلىسىنىڭ دەنە شىنىقتىرۋ, سپورت جانە تۋريزم باسقارماسىنىڭ جاڭا باسشىسى ارتاەۆ باقتيار عاريفوللا ۇلىن تانىستىردى, دەپ جازدى qandastar.kz

«بۇگىنگى ءماجىلىسىمىزدى باستاماس بۇرىن كادرلىق وزگەرىستەرگە توقتالۋعا رۇقسات ەتىڭىزدەر. مەملەكەت باسشىسى وتاندىق سپورت سالاسىن كەشەندى رەفورمالاۋ ارقىلى بۇقارالىق, بالالار مەن جاسوسپىرىمدەر سپورتىن دامىتۋدى تاپسىردى.

ول ءۇشىن بىزگە ءوز ءىسىن جەتىك بىلەتىن كاسىبي ماماندار, مىقتى باسشىلار, ۇزدىك مەنەدجەرلەر كەرەك. وسى ورايدا, تۋريزم جانە سپورت مينيسترلىگىنىڭ, مەملەكەتتىك قىزمەت ىستەرى اگەنتتىگىنىڭ كەلىسىمىمەن قىزىلوردا وبلىسىنىڭ دەنە شىنىقتىرۋ, سپورت جانە تۋريزم باسقارماسىنىڭ باسشىسى لاۋازىمىنا ارتاەۆ باقتيار عاريفوللا ۇلى تاعايىندالدى.

باقتيار عاريفوللا ۇلى – بارلىعىڭىزعا جاقسى تانىس, ءوز ءىسىنىڭ بىلىكتى مامانى, مىقتى مەنەدجەر. سپورت سالاسىنىڭ جاندانۋىنا وراسان زور ۇلەس قوسقان ازامات. 2004 جىلى افينىدا وتكەن وليمپيادا ويىندارىندا ەل قورجىنىنا التىن سالعان چەمپيونىمىز, ۆەل باركەر كۋبوگىنىڭ يەگەرى, حالىقارالىق سپورت شەبەرى, قازاقستاننىڭ ەڭبەك سىڭىرگەن سپورت شەبەرى, بوكستان قازاقستان رەسپۋبليكاسىنىڭ 7 دۇركىن چەمپيونى.

باقتيار عاريفوللا ۇلىنىڭ وسى كەزگە دەيىن العان ءبىلىمى مەن جيناقتاعان مول تاجىريبەسىن ەسكەرىپ, سىر وڭىرىندەگى سپورت جانە تۋريزم سالاسىن بۇرىنعىدان دا قارقىندى دامىتادى دەپ سەنىم بىلدىرەمىز», – دەدى نۇرلىبەك نالىباەۆ.

باقتيار عاريفوللا ۇلى ارتاەۆ 1983 جىلى تاراز قالاسىندا دۇنيەگە كەلگەن. مۇحاممەد حايدار دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىقتانۋ», «مەنەدجمەنت», قازاق سپورت جانە تۋريزم اكادەمياسىن «دەنە شىنىقتىرۋ جانە سپورت», قازتۇتىنۋوداعى قاراعاندى ەكونوميكالىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىقتارى بويىنشا بىتىرگەن. «قۇقىقتانۋ», «دەنە شىنىقتىرۋ جانە سپورت» ماگيسترى.

ەڭبەك جولىن 2004 جىلى «تاراز گاز شارۋاشىلىعى باسقارماسى» جاۋاپكەرشىلىگى شەكتەۋلى سەرىكتەستىگىنىڭ مەنەدجەرى بولىپ باستاعان. 2009-2013 جىلدارى جامبىل وبلىسى ءايشابيبى اۋىلدىق وكرۋگىنىڭ اكىمى, جامبىل وبلىسىنىڭ دەنە شىنىقتىرۋ, سپورت جانە تۋريزم باسقارماسىنىڭ باسشىسى, جامبىل وبلىسى اكىمى اپپاراتى باسشىسىنىڭ ورىنباسارى.

2013-2021 جىلدارى «استانا» پرەزيدەنتتىك كاسىپقوي سپورت كلۋبى» كورپوروتيۆتىك قورىنىنىڭ پرەزيدەنتى, «تارلان باتىرلارى» جشس ديرەكتورى, «استانا ارلانس» جشس باس مەنەدجەرى. 2021-2022 جىلدارى «قازاقستان بوكس فەدەراتسياسى» قاۋىمداستىعىنىڭ ۇلتتىق كوماندالار ۇيلەستىرۋشىسى, ۆيتسە-پرەزيدەنتى, سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكتسياسىنىڭ بوكستان مەملەكەتتىك جاتتىقتىرۋشىسى قىزمەتتەرىن اتقارعان.

ەلىمىزدە سپورت سالاسىنىڭ دامۋىنا قوسقان ەلەۋلى ۇلەسى ءۇشىن ءى دارەجەلى «بارىس» وردەنىمەن ناگرادتالعان.

باقتيار عاريفوللا ۇلى بۇعان دەيىندە جامبىل وبلىسىنىڭ دەنە شىنىقتىرۋ, سپورت جانە تۋريزم باسقارماسىن باسقارىپ, سپورت سالاسىنىڭ دامۋىنا سۇبەلى ۇلەس قوسقان.

وبلىس اكىمى جاڭا باسشىعا وڭىردەگى بۇقارالىق سپورتپەن اينالىسۋشىلار ۇلەسىن ارتتىرۋدى, كوماندالاردى دايارلاۋدى جانە ولاردىڭ رەسپۋبليكالىق, حالىقارالىق سپورتتىق جارىستاردا ونەر كورسەتۋiن قامتاماسىز ەتۋدى تاپسىردى. ءبىلىم بەرۋ ۇيىمدارىنىڭ سپورت عيماراتتارىندا ساباقتان تىس, كەشكى ۋاقىتتا سپورت سەكتسيالارى جۇمىسىن ۇيلەستىرۋدى جانە سپورتتىق ءىس-شارالار وتكىزۋدى, «Damu bala» باعدارلاماسى اياسىندا جان باسىنا شاققاندا قارجىلاندىرۋ ماسەلەسىن جۇيەلەندىرۋدى, باسقا دا مىندەتتەردى ايقىنداپ بەردى.