جاڭالىقتار
باقىلاۋ كۇشەيتىلەدى: قازاقستاننىڭ باس سانيتاريا دارىگەرى مايمىل شەشەگىنە بايلانىستى جاڭا قاۋلىعا قول قويدى
فوتو: NUR.KZ/پەتر كارانداشوۆ
قازاقستاننىڭ باس مەملەكەتتىك سانيتاريا دارىگەرىنىڭ مىندەتىن اتقارۋشى نۇرقان سادۋاقاسوۆ الەمدە مايمىل شەشەگىنىڭ ورشۋىنە بايلانىستى جاڭا قاۋلىعا قول قويدى. بۇل تۋرالى KAZ.NUR.KZ حابارلايدى.
قاۋلى قازاقستانعا مايمىل شەشەگىنىڭ كەلۋى مەن تارالۋىنىڭ الدىن الۋ بويىنشا سانيتارلىق-پروفيلاكتيكالىق ءىس-شارالار جۇرگىزۋ ءۇشىن قابىلدانىپ وتىر. جەرگىلىكتى اتقارۋشى ورگاندارعا, مەملەكەتتىك دەنساۋلىق ساقتاۋ ورگاندارىنا مايمىل شەشەگى اۋرۋىنا كۇدىكتى ادامداردى انىقتاۋ, ەپيدەميولوگيالىق انامنەز جيناۋ, بايلانىستا بولعان ادامداردى وقشاۋلاۋ, ەمدەۋ, مەديتسينالىق باقىلاۋ بويىنشا مەنشىك نىسانىنا قاراماستان دەنساۋلىق ساقتاۋ ۇيىمدارىنىڭ مەديتسينا قىزمەتكەرلەرىنىڭ ساقتىعىن ارتتىرۋ بويىنشا وقىتۋ جۇرگىزۋدى قامتاماسىز ەتۋ تاپسىرىلدى. بۇعان قوسا دايىندىق دەڭگەيىن كوتەرۋ ءۇشىن ۆەدومستۆوارالىق وقۋ-جاتتىعۋلار وتكىزۋ جوسپارلانعان.
سونداي-اق مەديتسينالىق ۇيىمدار مايمىل شەشەگىمەن اۋىراتىن ناۋقاس (كۇدىكتى ادامدار) اكەلىنگەن جاعدايدا ينفەكتسيالىق ستاتسيونارلاردىڭ دايىندىعىن قامتاماسىز ەتۋى كەرەك. ۇقك شەكارا قىزمەتىنە سوڭعى 21 كۇن ىشىندە مايمىل شەشەگى بويىنشا ەندەميالىق ەلدەردەن كەلگەن نەمەسە سول ەلدەرگە بارعان قازاقستان رەسپۋبليكاسىنىڭ ازاماتتارىن مەديتسينالىق باقىلاۋدى قامتاماسىز ەتۋ تاپسىرىلدى.
شەكارا بەكەتتەرىندە پوليتسيانىڭ باقىلاۋ بەكەتتەرى ورناتىلادى. قارجى مينيسترلىگى مەن مەملەكەتتىك كىرىستەر كوميتەتىنە مەملەكەتتىك شەكارا ارقىلى اۆتوموبيل وتكىزۋ پۋنكتتەرىندە سانيتارلىق-كارانتيندىك باقىلاۋدى كۇشەيتۋ تاپسىرىلدى. ەۋرازيالىق ەكونوميكالىق وداقتىڭ كەدەندىك شەكاراسىمەن تۇسپا-تۇس كەلەتىن قازاقستان رەسپۋبليكاسىنىڭ مەملەكەتتىك شەكاراسى ارقىلى اۆتوموبيل وتكىزۋ پۋنكتتەرىندە بارلىق ادامعا مىندەتتى بايلانىسسىز تەرمومەتريا جۇرگىزىلەدى.
اۋەجايلاردا قاجەت بولعان جاعدايدا تەرمومەتريا قايتا ەنگىزىلەدى. كولىك مينيسترلىگى جقق بولۋىن قامتاماسىز ەتۋگە ءتيىس. كولىك قۇرالىندا جولاۋشىلاردى وتىراتىن ورىندارى بويىنشا وتىرۋىن قاتاڭ باقىلاۋ تاپسىرىلدى. مايمىل شەشەگىنىڭ الدىن الۋ بويىنشا تاعى قانداي شارالار قابىلدانعانىن قاۋلىدان تولىعىراق وقۋعا بولادى.
