باقىت سارسەكباەۆ ۇلتتىق قۇرامادا جۇمىس ىستەۋى كەرەك – مۇحيت امانتاەۆ

تانىمال بوكس باپكەرى مۇحيت امانتاەۆ «ءبىرىنشى بول» YouTube ارناسىنا بەرگەن سۇحباتىندا ۇلتتىق قۇرامادا باقىت سارسەكباەۆ سەكىلدى بوكسشىلار ەڭبەك ەتۋى كەرەك دەپ سانايدى,  دەپ حابارلايدى Qandastar.kz اقپارات پورتالى.

ونىڭ پىكىرىنشە, 2008 جىلعى بەيجىڭ وليمپياداسىنىڭ چەمپيونى باپكەرلىك قىزمەتتە دە ءبىراز بەلەستى باعىندىراتىنىنا سەنىمدى.

«قازاق بوكسىنا باقىت سارسەكباەۆ سەكىلدى اعالار كەرەك. بالالاردىڭ دايارلىعىنا, تارتىبىنە قارايتىن مىنەزدى, بىلىكتى, ەنەرگياسى تاسىپ تۇرعان ازاماتتار قاجەت-اق.

العاش رەت ول كىسىمەن 2006 جىلى تانىستىم. سول كەزدە-اق ول كىسى مىنەزدى بولاتىن. بىزدە وليمپيادادان كەيىن بوكسشىلاردىڭ جۇلدىز اۋرۋىنا شالدىعىپ, جەكە باپكەرلەرىن تىڭداماي كەتەتىنىن ەستىپ جاتامىن. ءتىپتى ۇلتتىق قۇراما باپكەرىنە باعىنبايتىندار دا بار ەكەن. باقىت اعامىز ەشكىمگە قارامايدى. سەن وليمپيادا چەمپيونىسىڭ با, الەم چەمپيوناسىنىڭ با, ول كىسىگە ءبارىبىر. شىعارىپ جىبەرەدى دە, ەسىڭدى جيعان سوڭ ورالاسىڭ دەيدى. بولدى. ۇلتتىق قۇراماعا سارسەكباەۆ سەكىلدى باپكەر كەرەك دەيتىنىم سوندىقتان», — دەيدى اماناتاەۆ.

ول سارسەكباەۆ بۇگىندە بوكستاعى كوشباسشى وزبەكستان قۇراماسىنىڭ ارتىق-كەم تۇسىن بىلەدى دەپ وتىر.

«بۇگىندە بوكستا ءنومىر ءبىرىنشى قۇراما وزبەكستان بولسا, باقىت اعامىز وزبەك بوكسىنىڭ ارتىقشىلىعىن دا, كەمشىن تۇسىن دا, تيىسىنشە ولاردى جەڭۋدىڭ جولدارىن دا بىلەدى. ءوزى وليمپيادا چەمپيونى, ول قالاي جەڭىسكە جەتۋ كەرەكتىگىن بىلەدى, ءوزى باستان وتكەرگەن. سوندىقتان ونى بالالارعا دا ۇيرەتە الادى. جاس بالا دا قاسىندا وليمپيادا چەمپيونى نۇسقاۋ بەرىپ تۇرعاندا, باسقاشا جۇمىس ىستەيدى, ۇمتىلادى, تىرىسادى, شابىت الادى.

ەكى وليمپيادانى «نولمەن» وتكىزدىك. تاعى قانشا كۇتەمىز? ءبىر-بىرىمىزگە اياقتان شالىپ, ىشتارلىق جاسايتىن كەز ارتتا قالدى. قازىر سارسەكباەۆتى تارتۋ كەرەك, باقىت اعا جۇمىس ىستەۋى ءتيىس. قايرات اعا ¬- وتە مىقتى باس باپكەر. بىراق باقىت اعامىز — بولاشاقتا ونىڭ ورنىن باسا الاتىن مامانداردىڭ ءبىرى. وليمپياداعا ءۇش جىل قالدى. قازىردىڭ وزىندە باقىت اعانى قۇراماعا قوسۋ قاجەت. باس باپكەر بولماسا دا, كەم دەگەندە قايرات اعانىڭ كومەكشىسى رەتىندە», — دەدى مۇحيت امانتاەۆ.

ايتا كەتەيىك, بۇگىندە باقىت سارسەكباەۆ قازاقستاننىڭ 22 جاسقا دەيىنگى بوكس قۇراماسىنىڭ باس باپكەرى قىزمەتىن اتقارادى. جاقىندا شري-لانكانىڭ كولومبو قالاسىندا وتكەن جاستار اراسىنداعى ازيا چەمپيوناتىندا ونىڭ شاكىرتتەرى 22 التىن مەدال جەڭىپ الدى.