Baqyt Sársekbaev ulttyq quramada jumys isteýi kerek – Muhıt Amantaev

Tanymal boks bapkeri Muhıt Amantaev «Birinshi bol» YouTube arnasyna bergen suhbatynda ulttyq quramada Baqyt Sársekbaev sekildi boksshylar eńbek etýi kerek dep sanaıdy,  dep habarlaıdy Qandastar.kz aqparat portaly.

Onyń pikirinshe, 2008 jylǵy Beıjiń Olımpıadasynyń chempıony bapkerlik qyzmette de biraz belesti baǵyndyratynyna senimdi.

«Qazaq boksyna Baqyt Sársekbaev sekildi aǵalar kerek. Balalardyń daıarlyǵyna, tártibine qaraıtyn minezdi, bilikti, energııasy tasyp turǵan azamattar qajet-aq.

Alǵash ret ol kisimen 2006 jyly tanystym. Sol kezde-aq ol kisi minezdi bolatyn. Bizde Olımpıadadan keıin boksshylardyń juldyz aýrýyna shaldyǵyp, jeke bapkerlerin tyńdamaı ketetinin estip jatamyn. Tipti ulttyq qurama bapkerine baǵynbaıtyndar da bar eken. Baqyt aǵamyz eshkimge qaramaıdy. Sen Olımpıada chempıonysyń ba, álem chempıonasynyń ba, ol kisige báribir. Shyǵaryp jiberedi de, esińdi jıǵan soń oralasyń deıdi. Boldy. Ulttyq quramaǵa Sársekbaev sekildi bapker kerek deıtinim sondyqtan», — deıdi Amanataev.

Ol Sársekbaev búginde bokstaǵy kóshbasshy О́zbekstan quramasynyń artyq-kem tusyn biledi dep otyr.

«Búginde boksta nómir birinshi qurama О́zbekstan bolsa, Baqyt aǵamyz ózbek boksynyń artyqshylyǵyn da, kemshin tusyn da, tıisinshe olardy jeńýdiń joldaryn da biledi. О́zi Olımpıada chempıony, ol qalaı jeńiske jetý kerektigin biledi, ózi bastan ótkergen. Sondyqtan ony balalarǵa da úırete alady. Jas bala da qasynda Olımpıada chempıony nusqaý berip turǵanda, basqasha jumys isteıdi, umtylady, tyrysady, shabyt alady.

Eki Olımpıadany «nólmen» ótkizdik. Taǵy qansha kútemiz? Bir-birimizge aıaqtan shalyp, ishtarlyq jasaıtyn kez artta qaldy. Qazir Sársekbaevty tartý kerek, Baqyt aǵa jumys isteýi tıis. Qaırat aǵa ¬- óte myqty bas bapker. Biraq Baqyt aǵamyz — bolashaqta onyń ornyn basa alatyn mamandardyń biri. Olımpıadaǵa úsh jyl qaldy. Qazirdiń ózinde Baqyt aǵany quramaǵa qosý qajet. Bas bapker bolmasa da, kem degende Qaırat aǵanyń kómekshisi retinde», — dedi Muhıt Amantaev.

Aıta keteıik, búginde Baqyt Sársekbaev Qazaqstannyń 22 jasqa deıingi boks quramasynyń bas bapkeri qyzmetin atqarady. Jaqynda Shrı-Lankanyń Kolombo qalasynda ótken jastar arasyndaǵy Azııa chempıonatynda onyń shákirtteri 22 altyn medal jeńip aldy.