ءبىلىم
بالاباقشا تاربيەشىسى بالانىڭ قولىن شىعارىپ جىبەرگەن
فوتو: اشىق دەرەككوز
ماڭعىستاۋ وبلىسىندا ءبىر جاسار قىزدى جۇلقىلاپ, قولىن شىعارىپ العان تاربيەشى جۇمىستان قۋىلدى. بوبەكجاي قىزمەتكەرى ءبۇلدىرشىننىڭ قولىن شىعارىپ العان سوڭ, العاشقى مەديتسينالىق كومەك تە كورسەتپەگەن. بالانىڭ جاراقات العانىن اتا-اناسى ۇيىنە كەلگەندە ءبىر-اق ءبىلىپتى, دەپ جازادى qandastar.kz
مۇنايلى اۋدانىنداعى جەكەمەنشىك بالاباقشادا قىز قولىن شىعارىپ الدى. اتا-انا بەينەباقىلاۋ كامەراسىن تەكسەرگەن كەزدە تاربيەشىنىڭ تىنىش جۇرگەن قىزدىڭ قولىنان تارتىپ كوتەرىپ, ورىندىققا وتىرعىزىپ جاتقانىن بايقاعان. بىراق قىز جىلاماپتى. تەك ۇيگە بارعاندا قولىنىڭ اۋىرىپ تۇرعانىن ايتقان.
بەينەجازبانى كورۋ بارىسىندا قىزمەتكەردىڭ گيگيەنا تالاپتارىن ساقتاماي, ەكى ىدىسقا قۇيىلعان سورپانى ءبىر قاسىقپەن 8 بالاعا بەرگەنى انىقتالدى. وسى جايتتاردان كەيىن تاربيەشىنىڭ كومەكشىسى دە جۇمىستان بوساتىلدى. مەكتەپكە دەيىنگى ءبىلىم بەرۋ مەكەمەسىنىڭ باسشىسى بۇل وقيعا ابايسىزدا بولعان دەيدى.
«تاربيەشى ول جەردە تەك بالانى ورنىنان كوتەرگەن. قۇزىرلى ورگاندار دا ول ۆيدەونى كوردى. بۇل جەردە زورلىق-زومبىلىق ارەكەتى جوق. ال تاماقتاندىرۋعا كەلەتىن بولساق, قىزمەتكەر ارتىق ىدىس-اياقتاردى جۋعىسى كەلمەي, ءوزىنىڭ جۇمىسىن جەڭىلدەتۋ ءۇشىن سولاي جاساعان. سول كۇنى مەن جۇمىستا بولمادىم, جىلدىڭ باسى بولعان سوڭ بالاباقشاعا وزگەرىستەر ەنگىزەيىن دەپ ورتالىقتىڭ شارۋاسىمەن سىرتقا شىعىپ كەتكەن ەدىم», – دەدى جەكەمەنشىك بالاباقشانىڭ ديرەكتورى راۋشان اياپبەرگەنوۆا.
