بالاباقشادا 2 جاسار بالا ىستىق سۋعا كۇيىپ قالعان

قىزىلورداعى بالاباقشالاردىڭ بىرىندە تاربيەشى مەن كومەكشىسىنىڭ سالعىرتتىعىنان 2 جاسار بالا ىستىق سۋعا كۇيىپ قالعان, دەپ حابارلادى Qandastar.kz سايتى اlmaty.tv-عا سىلتەمە جاساپ.

بالانىڭ دەنەسىنىڭ باسىم بولىگىن تەرميالىق كۇيىك شالعان. سوت-مەديتسينالىق ساراپتاما ءسابيدىڭ دەنساۋلىعىنا اۋىر زارداپ كەلگەنىن دە راستاعان.

قازىر ءبۇلدىرشىن اۋرۋحانادان ۇيىنە شىعارىلدى. الايدا كىنالىلەر ءالى زاڭ الدىندا جاۋاپقا تارتىلماپتى.

«تۇنىمەن ۇيىقتامايدى. تەك ۇيىقتاتىن, قىشىتاتىندى باساتىن دارىلەرمەن ۇيىقتايدى. سوسىن تۇنىمەن شوشىنادى. بالا كۇتۋشى مەن تاربيەشى ءوز ەركىمەن جۇمىستان بوساتىلدى. ءبىز وعان كونبەيمىز. نەگىزى بالاباقشا جابىلادى دەگەن. بىراق جابىلدى ما, بىلمەيمىز», — دەيدى قالا تۇرعىنى اينۇر ايداربەكوۆا.

وسى جاعدايعا بايلانىستى وبلىستىق ءبىلىم باسقارماسى تاراپىنان ارنايى كوميسسيا قۇرىلىپ, جەكە بالاباقشاعا زەردەلەۋ جۇرگىزىلگەن. ناتيجەسىندە بىرقاتار كەمشىلىك انىقتالىپ, بوبەكجايدى مەملەكەتتىك تاپسىرىس اياسىندا قارجىلداندىرۋ توقتاتىلعان. ال تاربيەشى مەن بالا كۇتۋشىگە قاتىستى قىلمىستىق ءىس ءالى تەرگەلىپ جاتىر.