جاڭالىقتار
بالاباقشادا بالالاردى سىزعىشپەن ۇرعان تاربيەشىگە ۇكىم شىقتى
شىمكەنت قالاسىندا «اي كوركەم» بالاباقشاسىنىڭ تاربيەشىسى كامەلەتكە تولماعان بالانى تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن كىنالى دەپ تانىلدى, دەپ حابارلايدى Qandastar.kz اقپارات پورتالى.
بۇل قىلمىستىق ءىستىڭ قوزعالۋىنىڭ سەبەبى — قوعامدا ۇلكەن رەزونانس تۋدىرعان بەينەجازبا بولدى. وندا پەداگوگتىڭ بەس جاسار تاربيەلەنۋشىنى سىزعىشپەن ۇرىپ جاتقانى كورىنەدى.
وقيعا 2025 جىلعى 4 ماۋسىمدا ورىن العان. 10 ماۋسىمدا اتالعان فاكتى بويىنشا قر قىلمىستىق كودەكسىنىڭ 140-بابىنىڭ 2-بولىگىنە سايكەس سوتقا دەيىنگى تەرگەپ-تەكسەرۋ باستالدى. كۇدىكتى — جارىلقاپ ا. ۇستالىپ, ۋاقىتشا ۇستاۋ يزولياتورىنا قامالدى.
2025 جىلعى 12 ماۋسىمدا شىمكەنت قالاسىنىڭ اۋدانارالىق قىلمىستىق سوتى تاربيەشىنى كىنالى دەپ تانىپ, وعان 80 ساعات قوعامدىق جۇمىس تۇرىندە جازا تاعايىندادى.
