Balabaqshada kóz jumǵan búldirshinniń tárbıeshilerine sot úkim shyǵardy

Foto: ashyq derekkóz

Atyraý oblysynda balabaqshada káriz qudyǵyna qulap kóz jumǵan búldirshinniń tárbıeshilerine sot úkimi shyqty, dep habarlady      qandastar.kz     oblystyń kámeletke tolmaǵandar isteri jónindegi mamandandyrylǵan aýdanaralyq soty.

Sotta «Chebýrashka» jekemenshik balabaqshasynyń ıesi men tárbıeshige qatysty qylmystyq is Qylmystyq kodekstiń 141-babynyń 2-bóligi «Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý” boıynsha qaraldy.

Atyraý oblysyndaǵy jekemenshik «Chebýrashka» balabaqshasy byltyr mamyr aıynda ashylǵan. Al shildede tárbıeshi jumysqa qabyldanǵan.

«Sol jyly, ıaǵnı 2023 jyly 1 qarashada 2020 jyly týǵan búldirshin «Chebýrashka» balabaqshasyna qabyldanǵan. Bıyl 10 shildede saǵat 10.45 shamasynda balabaqsha ıesi men tárbıeshi ózderiniń fýnkıonaldyq mindetterin tıisinshe oryndamaı, búldirshindi qaraýsyz qaldyrǵan. Saldarynan bala káriz qudyǵyna qulap, qaıtys boldy», — dep jazdy vedomstvo.

Sottalýshylar kinásin tolyqtaı moıyndaǵan.
Prokýror sottalýshylarǵa pedagogıkalyq laýazymdardy jáne kámeletke tolmaǵandarmen jumys isteýmen baılanysty laýazymdardy atqarý quqyǵynan 3 jylǵa aıyryp, 3 jyl merzimge bas bostandyǵynan aıyrý jazasyn taǵaıyndaýdy surady.

Al sottalýshylar men olardyń qorǵaýshylary sottan bas bostandyǵynan aıyrmaýdy suraǵan.

«Sottalýshylar Qylmystyq kodekstiń 141-baby 2-bóligimen kináli dep tanylyp, olarǵa pedagogıkalyq laýazymdardy jáne kámeletke tolmaǵandarmen jumys isteýmen baılanysty laýazymdardy atqarý quqyǵynan 3 jyl merzimge aıyra otyryp, 2 jyl 6 aı merzimge bas bostandyǵynan aıyrý jazasy kesildi. Qylmystyq kodekstiń 63-babymen jaza shartty túrde taǵaıyndalyp, belgilengen jazanyń barlyq merzimine probaııalyq baqylaý ornatyldy», — deıdi aýdanaralyq sot.

Sot úkimi zańdy kúshine áli engen joq.