Balabaqshada psıhonevrologııalyq esepte turǵan áıel jumys istegen

Foto: egemen.kz

Qadaǵalaýshy organ ókilderi óńirdegi birneshe bilim berý mekemesindegi zań buzýshylardy áshkereledi. Bul týraly Stan.kz aqparat agenttigi 31 arnanyń “Informbıýro” baǵdarlamasyna silteme jasap habarlaıdy.

Pavlodardaǵy jekemenshik balabaqshanyń birinde psıhonevrologııalyq dıspanserdiń esebinde turǵan áıel tárbıeshi bolyp jumys istegen. Bul jaǵdaıdy prokýrorlar tekseri barysynda anyqtaǵan.

Sondaı-aq Aqqýly aýdanynda mýzyka pániniń muǵaliminiń buryn adamǵa ortasha aýyrlyqtaǵy dene jaraqatyn salǵany úshin sotty bolǵany anyqtaldy. Al Tereńkól aýdanyndaǵy 200-ge jýyq bala jattyǵatyn tennıs ortalyǵyndaǵy kadr bóliminde buryn esirtki qylmysy úshin jaýapkershilikke tartylǵan adam jumys istegen.

“Isti bolǵandar mektep pen balabaqshalarda aýla sypyrýshy, tazalyqqa jaýapty qyzmetker retinde de uzaq jyldar boıy qyzmet etip kelgen. Zań buzǵan tulǵalar birden jumystan shyǵarylyp, bilim berý mekemeleriniń basshylaryna tıisti shara qoldanylmaq”, – delingen habarlamada.

Pavlodar oblystyq prokýratýrasy quqyqtyq aqparatty qalyptastyrý bóliminiń bastyǵy Serik Ahmetov zań boıynsha kisi óltirý, densaýlyqqa qasaqana zııan keltirý, ekstremızm, adam saýdasy sekildi qylmys jasaǵandar balalarmen jumys istemeýi tıis ekenin atap ótti. Biraq jekemenshik mektep pen balabaqshalar zańdy jıi buzatyn kórinedi. Buryn isti bolǵan azamattar qazir jumystan shyǵaryldy. Prokýratýra birneshe iske qatysty tergeý jumystaryn júrgizip jatyr.