بالاباقشاعا بارمايتىن بالالاردى تىركەپ, ءۇش جىل بويى اقشا جىمقىرعاندار سوتتالدى

فوتو: اشىق دەرەككوز

سولتۇستىك قازاقستان وبلىسىندا بالاباقشا قىزمەتكەرلەرى مەكتەپكە دەيىنگى ۇيىمعا ءىس جۇزىندە بارمايتىن بالالاردى تىركەۋ ارقىلى بيۋدجەت قاراجاتىن زاڭسىز يەمدەنگەن, – دەپ حابارلايدى qandastar.kz Massaget.kz-كە سىلتەمە جاساپ.

سقو پروكۋرورلارى تەكسەرۋ قورىتىندىلارى بويىنشا ءبىلىم بەرۋ ۇيىمدارىنىڭ قىزمەتىندە سوتقا دەيىنگى تەرگەپ-تەكسەرۋدى باستادى. ايىرتاۋ اۋداندىق سوتىنىڭ ۇكىمىمەن مەكتەپكە دەيىنگى ۇيىمنىڭ كىنالى ادامى مەملەكەت بيۋدجەتىنە كەلتىرىلگەن زياندى تولىق كولەمدە وتەي وتىرىپ, 3 جىل 6 ايعا باس بوستاندىعىن شەكتەۋگە سوتتالدى.

تەكسەرۋ بارىسىندا ايىرتاۋ اۋداندىق پروكۋراتۋراسى بالاباقشالاردىڭ ءبىرىنىڭ قىزمەتكەرلەرى مەكتەپكە دەيىنگى ۇيىمعا ءىس جۇزىندە بارمايتىن بالالاردى تىركەۋ ارقىلى بيۋدجەت قاراجاتىن زاڭسىز العاندارىن انىقتادى.

بۇل ارەكەتتەردىڭ بارلىعى سوڭعى 3 جىلدا 2021-2024 جىلدار ارالىعىندا جاسالعان.

سونىمەن قاتار, ايىرتاۋ اۋداندىق پروكۋراتۋراسىمەن اۋداندىق ءبىلىم ءبولىمىنىڭ قىزمەتكەرلەرىنە قاتىستى باستالعان سوتقا دەيىنگى تەرگەپ-تەكسەرۋ جالعاسىپ جاتىر. قىلمىستىق-پروتسەستىك كودەكستىڭ 201-بابىنىڭ تالاپتارىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى.

تەكسەرۋلەر بارىسىندا باسقا دا زاڭ بۇزۋشىلىقتار انىقتالىپ, ءتيىستى قاداعالاۋ اكتىلەرى ەنگىزىلدى.