جاڭالىقتار
بالاباقشالاردىڭ بىرىنەن شۋ شىقتى – ءبىلىم باسقارماسى تۇسىنىكتەمە بەردى
فوتو: اشىق دەرەككوز
الەۋمەتتىك جەلىدە اقتاۋداعى بالالاباقشالاردىڭ بىرىندە بالالارعا تاماق تولىققاندى بەرىلمەيتىنى جايلى اقپارات تارادى. ماڭعىستاۋ وبلىستىق ءبىلىم باسقارماسى Sputnik قازاقستان رەداكتسياسىنىڭ وسى ماسەلەگە قاتىستى ساۋالىنا جاۋاپ بەردى.
الەۋمەتتىك جەلىدە تاراعان اقپارات بويىنشا اقتاۋدىڭ 9-ىقشام اۋدانىندا ورنالاسقان №29 بالاباقشادا بۇلدىرشىندەرگە تاماق دۇرىس بەرىلمەيدى.
«ۆيدەوعا قاراعاندا تاڭعى اسقا 12 بالاعا تەك بەس پورتسيا تاماق, ال كەشكە 4 پورتسيا عانا بوتقا بەردى. تاماقتى كىم الىپ ۇلگەرەدى سول جەيدى, ال ۇلگەرمەگەنى تاماق جەگەن بالانىڭ بەتىنە قاراپ وتىرادى. بالاباقشاعا تەكسەرۋ جۇرگىزۋدى تالاپ ەتەمىز», — دەپ جازدى اتا-انالار الەۋمەتتىك جەلىدە.
بۇل ماسەلەگە قاتىستى ماڭعىستاۋ وبلىستىق ءبىلىم باسقارماسى تۇسىنىكتەمە بەردى.
«28 ماۋسىمدا اتا-انانىڭ شاعىمىنا بايلانىستى بوبەكجايدىڭ بەينەجازباسىن قاراۋ بارىسىندا 7-توپتىڭ تاربيەشىسى تاڭعى اس مەزگىلىندە تاماقتى جەتكىلىكسىز سالعاندىعى انىقتالدى. توپتىڭ تاربيەشىسىنەن تۇسىنىكتەمە الىندى. تاربيەشى تاڭعى استى بالالار جەمەيتىنىن, تاماق قالىپ قوياتىندىقتان ازعانتاي سالعاندىعىن ايتتى», — دەيدى وبلىستىق ءبىلىم باسقارماسى.
ۆەدومستۆونىڭ ايتۋىنشا, تاربيەشىگە تارتىپتىك شارا قولدانىلعان. بوبەكجاي اكىمشىلىگى اتا-انامەن كەزدەسىپ, كەشىرىم سۇراعان.
«الايدا ءبىلىم ءبولىمى جانىنان ارنايى كوميسسيا قۇرىلىپ, دۇيسەنبىدەن باستاپ زەردەلەۋ جۇمىستارى جۇرگىزىلىپ جاتىر. زەردەلەۋ كوميسسياسىنىڭ قورىتىندىسى بويىنشا ءتيىستى شارالار قابىلدانادى», — دەيدى ماڭعىستاۋ وبلىسىنىڭ ءبىلىم باسقارماسى.
