Jańalyqtar
Balabaqshalardyń birinen shý shyqty – bilim basqarmasy túsinikteme berdi
Foto: ashyq derekkóz
Áleýmettik jelide Aqtaýdaǵy balalabaqshalardyń birinde balalarǵa tamaq tolyqqandy berilmeıtini jaıly aqparat tarady. Mańǵystaý oblystyq bilim basqarmasy Sputnik Qazaqstan redakııasynyń osy máselege qatysty saýalyna jaýap berdi.
Áleýmettik jelide taraǵan aqparat boıynsha Aqtaýdyń 9-yqsham aýdanynda ornalasqan №29 balabaqshada búldirshinderge tamaq durys berilmeıdi.
«Vıdeoǵa qaraǵanda tańǵy asqa 12 balaǵa tek bes porııa tamaq, al keshke 4 porııa ǵana botqa berdi. Tamaqty kim alyp úlgeredi sol jeıdi, al úlgermegeni tamaq jegen balanyń betine qarap otyrady. Balabaqshaǵa tekserý júrgizýdi talap etemiz», — dep jazdy ata-analar áleýmettik jelide.
Bul máselege qatysty Mańǵystaý oblystyq bilim basqarmasy túsinikteme berdi.
«28 maýsymda ata-ananyń shaǵymyna baılanysty bóbekjaıdyń beınejazbasyn qaraý barysynda 7-toptyń tárbıeshisi tańǵy as mezgilinde tamaqty jetkiliksiz salǵandyǵy anyqtaldy. Toptyń tárbıeshisinen túsinikteme alyndy. Tárbıeshi tańǵy asty balalar jemeıtinin, tamaq qalyp qoıatyndyqtan azǵantaı salǵandyǵyn aıtty», — deıdi oblystyq bilim basqarmasy.
Vedomstvonyń aıtýynsha, tárbıeshige tártiptik shara qoldanylǵan. Bóbekjaı ákimshiligi ata-anamen kezdesip, keshirim suraǵan.
«Alaıda bilim bólimi janynan arnaıy komıssııa qurylyp, dúısenbiden bastap zerdeleý jumystary júrgizilip jatyr. Zerdeleý komıssııasynyń qorytyndysy boıynsha tıisti sharalar qabyldanady», — deıdi Mańǵystaý oblysynyń bilim basqarmasy.
