«بالالاردىڭ ءتىلى ورىسشا شىعىپ جاتىر». تانىمال اقىن جانايقايىن جەتكىزدى

فوتو: اشىق دەرەككوز

اقىن باقىت بەدەلحان دۋلات تاستەكەيگە بەرگەن سۇحباتىندا تەلەۆيزيا — ۇلتتىق يدەولوگيانىڭ نەگىزگى قارۋى ەكەنىن ءتۇسىندىردى, — دەپ حابارلايدى Massaget.kzءتىلشىسى.

اقىننىڭ ايتۋىنشا, تەلەديداردان كورسەتىلىپ جاتىرعان ورىسشا مۋلتفيلدەردىڭ كەسىرىنەن كوپشىلىك بالانىڭ ءتىلى ورىسشا شىعىپ جاتىر.

«مەنىڭ ورىسشا بىلمەيتىن ءبىر دوسىم بار. بىراق بالاسى قازاقشا بىلمەيدى, ءتىلى ورىسشا شىققان. «دوسىم-اۋ مىناۋ قالاي بولعانى, ونىمەن قالاي سويلەسەسىڭ» دەسەم, «بىلمەيمىن, ازاندا كەتەمىز, كەشكە كەلەمىز, تەلەديداردان مۋلتفيلم قاراپ وتىرادى» دەيدى. بۇل تەلەۆيزيا — ۇلتتىق يدەولوگيانىڭ نەگىزگى قارۋى ەكەنىن بىلە تۇرا, ادەيى سايقىمازاققا سالىپ تاستاۋىمىزدىڭ كەسىرى. مەملەكەتتىڭ قارجىسىنداعى, مەملەكەتتىڭ كوزى, قۇلاعى, ايناسى بولىپ تۇرعان ارنالاردى نەگە سايقىمازاق شوۋعا اينالدىرىپ جىبەردىك? نەگە ورىسشا مۋلتفيلمدەردى قاپتاتىپ قويدىق? ەۋروپانىڭ, رەسەيدىڭ, جاپونيانىڭ, قىتايدىڭ مۋلتفيلمدەرى ءورىپ ءجۇر. ونىڭ يدەولوگياسى, تاربيەسى باسقا. بالا تىنىش بولسا بولدى دەپ قاداعالامايتىن دا اتا-انالار بار.  ءبىر جاعىنان, قالا دەگەن قاتىگەزدەۋ تۇرمىس-تىرشىلىكتىڭ ىرعاعى. بالانى باعىپ وتىراتىن ۋاقىت كەرەك. بالامەن وتىرايىن دەسە, تىرشىلىك جاساپ, مال تابۋ كەرەك. ءسويتىپ, نەمقۇرالىلىق ەڭبەكتىلىكپەن كەلە جاتىر», — دەيدى باقىت بەدەلحان.

اقىن باقىت بەدەلحان بالا تاربيەلەپ وتىرعان اتا-انالارعا كەڭەس بەردى.

«ەڭ ءبىرىنشى, كەز كەلگەن ادام ەرتەڭىن ەڭسەلى ەتىپ كورە الماسا, كەلەشەگىن كەمەلدى ەتىپ ەلەستەتە الماسا, ءومىر ءسۇرۋدىڭ كەرەگى جوق. كوڭىل ماسەلەسى دە, جۇرەك ماسەلەسى دە قالادى. ەرتەڭىن ويلاماعان ەركەكتەن بەز دەيدى. ەرتەڭىن ويلاۋ ءۇشىن بالانى ويلاۋ كەرەك. بالاعا نەشە ءتۇرلىنى كورسەتىپ قويامىز دا, 10 جىل دا ول ەسەيىپ شىعا كەلەدى. ودان كەيىن ونىڭ نەمەن اينالىسىپ جۇرگەنىن باقىلايىن دەسە, قاداعالا الماي قالادى. وسىنداي قاتەلىكتەر كوپ بولادى. مۇمكىندىگىنشە, بالانى مەيىرىم مەن شۋاققا بولەپ, ماقتاۋمەن مارتەبەسىن كوتەرىپ, قارا جۇمىسقا سالۋ كەرەك. قارا جۇمىس دەپ وتىرعانىم  — قالاداعى وقۋ, ءبىلىم, كىتاپ»,  — دەپ كەڭەس بەردى اقىن.