«Balalardyń tili oryssha shyǵyp jatyr». Tanymal aqyn janaıqaıyn jetkizdi

Foto: ashyq derekkóz

Aqyn Baqyt Bedelhan Dýlat Tastekeıge bergen suhbatynda televızııa — ulttyq ıdeologııanyń negizgi qarýy ekenin túsindirdi, — dep habarlaıdy Massaget.kztilshisi.

Aqynnyń aıtýynsha, teledıdardan kórsetilip jatyrǵan oryssha mýltfılderdiń kesirinen kópshilik balanyń tili oryssha shyǵyp jatyr.

«Meniń oryssha bilmeıtin bir dosym bar. Biraq balasy qazaqsha bilmeıdi, tili oryssha shyqqan. «Dosym-aý mynaý qalaı bolǵany, onymen qalaı sóılesesiń» desem, «Bilmeımin, azanda ketemiz, keshke kelemiz, teledıdardan mýltfılm qarap otyrady» deıdi. Bul televızııa — ulttyq ıdeologııanyń negizgi qarýy ekenin bile tura, ádeıi saıqymazaqqa salyp tastaýymyzdyń kesiri. Memlekettiń qarjysyndaǵy, memlekettiń kózi, qulaǵy, aınasy bolyp turǵan arnalardy nege saıqymazaq shoýǵa aınaldyryp jiberdik? Nege oryssha mýltfılmderdi qaptatyp qoıdyq? Eýropanyń, Reseıdiń, Japonııanyń, Qytaıdyń mýltfılmderi órip júr. Onyń ıdeologııasy, tárbıesi basqa. Bala tynysh bolsa boldy dep qadaǵalamaıtyn da ata-analar bar.  Bir jaǵynan, qala degen qatygezdeý turmys-tirshiliktiń yrǵaǵy. Balany baǵyp otyratyn ýaqyt kerek. Balamen otyraıyn dese, tirshilik jasap, mal tabý kerek. Sóıtip, nemquralylyq eńbektilikpen kele jatyr», — deıdi Baqyt Bedelhan.

Aqyn Baqyt Bedelhan bala tárbıelep otyrǵan ata-analarǵa keńes berdi.

«Eń birinshi, kez kelgen adam erteńin eńseli etip kóre almasa, keleshegin kemeldi etip elestete almasa, ómir súrýdiń keregi joq. Kóńil máselesi de, júrek máselesi de qalady. Erteńin oılamaǵan erkekten bez deıdi. Erteńin oılaý úshin balany oılaý kerek. Balaǵa neshe túrlini kórsetip qoıamyz da, 10 jyl da ol eseıip shyǵa keledi. Odan keıin onyń nemen aınalysyp júrgenin baqylaıyn dese, qadaǵala almaı qalady. Osyndaı qatelikter kóp bolady. Múmkindiginshe, balany meıirim men shýaqqa bólep, maqtaýmen mártebesin kóterip, qara jumysqa salý kerek. Qara jumys dep otyrǵanym  — qaladaǵy oqý, bilim, kitap»,  — dep keńes berdi aqyn.