بالالارعا زيان بوياعىش بار: قىرعىزستاندا اۋعانستاندىق گازدالعان انار سۋسىنىنا تىيىم سالىنىپ جاتىر

قىرعىزستان اۋعانستاندا وندىرىلگەن «Golden Life» گازدالعان انار سۋسىنىنا تىيىم سالىپ جاتىر,-دەپ حابارلايدى Qandastar.kz

وش قالاسىندا انار سۋسىنى ساۋدا ورىندارىنان تاركىلەنىپ جاتىر. قىرعىزستاننىڭ دەنساۋلىق ساقتاۋ مينيسترلىگى جانىنداعى اۋرۋلاردىڭ الدىن الۋ جانە مەملەكەتتىك سانيتارلىق-ەپيدەميولوگيالىق قاداعالاۋ دەپارتامەنتىنىڭ بۇيرىعىنا سۋسىن تالاپتارعا ساي كەلمەيدى ەكەن. تىيىم حالىقتىڭ, اسىرەسە, بالالاردىڭ دەنساۋلىعىن قورعاۋ ماقساتىندا ەنگىزىلگەن. ويتكەنى سۋسىننىڭ قۇرامىندا بالالاردىڭ بەلسەندىلىگى مەن زەيىنىنە تەرىس اسەر ەتەتىن ازورۋبين E 122 بوياعىشى بار.

ساۋدا جەلىلەرىنىڭ باسشىلارىنا وسى ونىمدەردى ساتۋعا تىيىم سالۋ تۋرالى بۇيرىقتار بەرىلگەن. قازاقستاندا بۇل سۋسىندار ساتىلادى ءارى باعاسىنىڭ تومەندىگىمەن تانىمال.