بالالارمەن توبەلەسكەن اقتوبەلىك وقۋشى زاعيپ بولىپ قالۋى مۇمكىن

اقتوبەلىك 16 جاستاعى مەكتەپ وقۋشىسى جاسوسپىرىمدەر اراسىنداعى توبەلەس كەزىندە كوزىلدىرىكتىڭ سىنىقتارى كوزىنە ءتۇسىپ, قاتتى زاقىمداعان, دەپ حابارلادى Qandastar.kz.

قازىر ول ەكىنشى وتاعا دايىندالىپ جاتىر. تۋىستارىنىڭ ايتۋىنشا, بالانىڭ كورۋ قابىلەتىنەن تولىق ايىرىلۋ قاۋپى بار, ال پوليتسيا تەرگەۋدى سوزىپ جاتىر. بۇل تۋرالى Tengrinews.kz جازدى.

وقيعا 29 ماۋسىم كۇنى اقتوبەدەگى اۆياقالاشىق ىقشاماۋدانىندا بولعان. جاسوسپىرىمدەر توبى اراسىندا جانجال تۋىنداپ, ول توبەلەسپەن اياقتالعان. سول توبەلەسكە قاتىسۋشىلاردىڭ ءبىرى كوزىلدىرىك كيىپ جۇرگەن 16 جاستاعى ءجاسوسپىرىمدى ۇرىپ جىبەرگەن.

«كوزىلدىرىكتىڭ اينەگى سىنىپ, ونىڭ سىنىقتارى بالانىڭ كوزىنە كىرىپ كەتتى. سول وقيعادان كەيىن وعان وتا جاسالدى. بىراق بۇل جەتكىلىكسىز, قازىر ول كورۋ قابىلەتىنەن ايىرىلۋى مۇمكىن», – دەيدى وقۋشىنىڭ تاتەسى.

كورۋ قابىلەتىن قالپىنا كەلتىرۋ مۇمكىندىگىن باعالاۋ ءۇشىن تاعى ءبىر وپەراتسيا قاجەت, وعان بالا قازىر دايىندالىپ جاتىر. اقتوبە وبلىستىق پوليتسيا دەپارتامەنتى وقيعا بولعانىن راستادى.

«بارلىق قاتىسۋشىلار انىقتالىپ, پوليتسيا بولىمىنە جەتكىزىلدى. جاسوسپىرىمدەر اراسىندا جانجال تۋىنداپ, كۇدىكتى جابىرلەنۋشىنى ۇرىپ جىبەرگەن. ناتيجەسىندە جابىرلەنۋشى كوزىلدىرىكتىڭ اينەك سىنىقتارىنان كوزىنەن جاراقات الدى. ورتاشا اۋىرلىقتاعى دەنساۋلىققا قاساقانا زيان كەلتىرۋ فاكتىسى بويىنشا سوتقا دەيىنگى تەرگەۋ جۇرگىزىلۋدە. تەرگەۋ بارىسىندا ءاربىر قاتىسۋشىنىڭ ارەكەتىنە قۇقىقتىق باعا بەرىلەدى», – دەدى وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ جەتەكشىسى ەربولات ساركۇلوۆ.

سونداي-اق پوليتسيا كامەلەتكە تولماعان بالانىڭ تاربيەسىنە ءتيىستى دەڭگەيدە ءمان بەرمەگەنى ءۇشىن اتا-انالاردى جاۋاپكەرشىلىككە تارتۋ ماسەلەسىن قاراستىرىپ جاتقانىن مالىمدەدى.

وسى ارادا جابىرلەنۋشىنىڭ تۋىستارى تەرگەۋدىڭ تىم باياۋ ءجۇرىپ جاتقانىن ايتىپ, الاڭداۋشىلىق بىلدىرۋدە. ولاردىڭ سوزىنشە, جاعداي وتە اۋىر: ەكىنشى وتادان كەيىن بالا مۇلدە كورمەي قالۋى مۇمكىن.

ء«بىز بۇل قايعىنى ءوزىمىز عانا ارقالاپ قالامىز با دەپ قورقامىز. تەرگەۋ وتە باياۋ ءجۇرىپ جاتىر, ۋادە بەرگەنىمەن, ەش ناتيجە جوق», – دەيدى مەكتەپ وقۋشىسىنىڭ جاقىندارى.