بالالارى ونەرلى بالاباقشا

بالاڭىزدىڭ امان-ساۋلىعىنا جاۋاپ بەرىپ قانا قويماي, ونەگەلى تالىمگە باۋلىپ, حالىقارالىق بايقاۋلارعا دەيىن قاتىستىراتىن بالاباقشاعا بارعانىن قالار ما ەدىڭىز? ارينە, بۇل — ءار اتا-انانىڭ اسىل ارمانى. وسى رەتتە دانا حالقىمىز: «بالانىڭ وسكەن بەسىگى – كەڭ دۇنيەنىڭ ەسىگى» دەپ بەكەر ايتپاسا كەرەك.

10 جەلتوقسان كۇنى مەملەكەتتىك رەسپۋبليكالىق ۇيعىر تەاترىندا  بالالار ونەرىن قولداۋ ماقساتىندا «بي الەمى» حالىقارالىق ونەر بايقاۋى ءوتتى. بايقاۋعا بالا-باقشا بالالارى مەن وقۋشىلار قاتىستى. ىشىنەن وق بويى وزىق شىققان, قانجىعاسىنا 1-ورىندى بايلاعان «چۋدو-دەتكي» بالاباقشاسىنىڭ 22 ونەرپازى ەدى. ولاردىڭ جاستارى نەبارى 5-6-دا. «ۇلتتىق تاربيە – بالا جانىنىڭ قورەگى» دەگەندەي حالىقارالىق ونەر بايقاۋىندا بالالار ۇلتتىق اۋەنگە قازاقتىڭ قاسيەتىن بىلدىرگەن كوك ءتۇستى تۋى بەينەلەنگەن كيىمدى كيىپ, «جاسا قازاقستان» ءبيىن بيلەدى. ساحنادا تۇرعان جالىنداعان بالالار قۇددى ءبىر بي سالاسىنىڭ مايتالماندارى ما دەرسىڭ… بويلارىندا تۋلاعان ىستىق قانى كورەرمەندەرگە سەزىلىپ-اق تۇردى.  ولار: مۇراتحان جانيا, امانتاي باتىرحان, ەرمەك لەيسان, قۇسانعازى ايانات, ساۋلەباەۆا ايكۇنىم, حۋساين نۇريسلام, مۇراتحان رايانا, قالي ەستاي, تلەميسوۆ ايبەك, نۇربەك مۇحاممەد, سەيفۋللا يبراحيم, باقتىعۇل اليار, قابىلعازى اليما, امانگەلديەۆ الديار, الدا-ونگاروۆ رامازان, تاليپباي ماليكا, باقىتجان اسىلجان, بولات دىنمۇحاممەد, باۋىرجان ۇلى ءالىم, ابدىكەرىم الياكبار, قايرات دانيال, تاسبولات ايرات ەسىمدى بۇلدىرشىندەر ەدى… بۇل بۇلدىرشىندەردىڭ اتا-انالارىمەن دە تىلدەسۋدىڭ ءساتى تۋىپ, سۇراق استىنا الدىق.

نۇربەك مۇحاممەدتىڭ اناسى: «ءبىز بۇل بالاباقشاعا كەلىپ جۇرگەنىمىزگە نەبارى 2-اق جىل بولدى. شىنىمدى ايتسام, بالامدا مۇلدەم قابىلەت جوق ەدى. ۇيدە وزىمەن ءوزى جۇرگەن بالا عوي. بىراق وسى بالاباقشاعا كىرگەلى بالامنىڭ كوزى جانىپ, ءار ءتۇرلى ونەرگە دەگەن قىزىعۋشىلىعى وياندى. بالام ساحناعا شىققاندا قاتتى تولقىدىم» دەسە, امانتاي باتىرحاننىڭ اناسى: «بۇل – ءبىزدىڭ ءبىرىنشى بايقاۋىمىز ەمەس. وسىنىڭ الدىندا حالىقارالىق بايقاۋدا اكتەرلىك شەبەرلىك بويىنشا باق سىناعان ەدىك. ول جەردە دە بىزگە گران-پري بۇيىردى. نەگىزى بالامدا 1 جاس 7 ايىنان باستاپ ونەرگە قابىلەتى بارىن بايقاعانبىز. بىراق اسا ءمان بەرە قويمادىق. بالاباقشانىڭ ارقاسىندا ەندى ساحنادان بوي كورسەتۋدە. انا رەتىندە بالامنىڭ مۇنداي جەتىستىگىن كورۋ – مەن ءۇشىن ۇلكەن باقىت» دەپ قۋانىشىن جاسىرمادى.

راسىمەن, اتا-انالار ايتقانداي, سانى دا, ساپاسى دا جوق بالا-باقشالاردىڭ قاسىندا الماتىنىڭ شەتىندە ورنالاسقان چۋدو-دەتكي بالا-باقشاسى وزىق ەكەنى انىق. «ونەرلى بالا ونەرلى تاربيەشىدەن» ەكەنىن ەسكەرسەك, بۇل جەردە حورەوگراف تالاندى وشاكباەۆنانىڭ, ادىسكەر ءارى جەتەكشى جانار ساتتىبەكقىزىنىڭ جانە بالاباقشا مەڭگەرۋشىسى مارۋان توحانوۆنانىڭ ۇلەسى زور-اق…

اقگۇل ايداربەكقىزى