بالالارىڭ بار ەكەنى ەندى ەسىڭە ءتۇستى مە: كۇيەۋى كەش كەلگەن ايەلىن پىشاقتاپ ءولتىردى

فوتو: اشىق دەرەككوز

جانتۇرشىگەرلىك قىلمىس بيىل 21 ماۋسىمدا اقتوبە وبلىسىنىڭ مارتوك اۋىلىندا بولعان. كۇيەۋى ءوز ايەلىن قىزعانىشتان پىشاقتاپ, ءولتىردى. ونىڭ جاق سۇيەگىن جانە بۇعاناسىن سىندىرعان دەپ حابارلايدى Qandastar.kz.

21 ماۋسىمدا كەشكى ساعات 22:00 شاماسىندا ەر ادام بالالارىن ۇيىقتاتىپ, ايەلىنە قوڭىراۋ شالىپ, قايدا جۇرگەنىن جانە قاشان ۇيگە كەلەتىنىن سۇراي باستاعان. ايەلى ارىپتەستەرىمەن قىدىرىپ جۇرگەنىن جانە كەيىنىرەك كەلەتىنىن ايتقان. ءبىراز ۋاقىتتان كەيىن ەر ادام تەرەزەدەن ايەلىنىڭ كولىكتەن ءتۇسىپ, اۋلاعا كىرگەنىن كورگەن. وسى ۋاقىت ارالىعىندا ىشىمدىك ءىشىپ العان كۇيەۋى اس ۇيدەن پىشاق الىپ, اۋلاعا شىعىپ, ايەلىن بالاعاتتاي باستايدى. «نەگە قاڭعىرىپ ءجۇرسىڭ? بالالارىڭنىڭ بارى ەندى ەسىڭە ءتۇستى مە? » – دەپ ايەلىمەن جانجالداسىپ كەتكەن.

ەرلى-زايىپتىلار اراسىندا جانجال كەزىندە كۇيەۋى ايەلىن شاشىنان ۇستاپ تۇرىپ, موينىنا پىشاق سۇعىپ العان. ايەلى جەرگە قۇلاعاننان كەيىن دە دەنەسىنىڭ ءار جەرىنە بىرنەشە رەت پىشاق جاراقاتىن سالعان.

كەيىن ساراپشىلار مارقۇمنىڭ دەنەسىنەن كوپتەگەن پىشاق جاراقاتىن, جاق سۇيەگى مەن بۇعاناسىنىڭ سىنعانىن انىقتاعان. العان جاراقاتتارىنان ايەل سول جەردە قازا تاپقان.

ەر ادام كورشىسى مەن مارقۇمنىڭ اناسى جۇگىرىپ شىققاننان كەيىن عانا توقتاعان. سوتتا ءسوز سويلەپ, سول قايعىلى كەشتە مارقۇم بىرنەشە رەت قوڭىراۋ شالىپ, بالالارىن تەكسەرۋدى سۇراعانىن جانە قالادان اۋىلعا تاكسي تابا الماي جۇرگەنىن ايتقانىن باياندادى.

سوتتالۋشى ءوز كىناسىن مويىنداپ, ايەلىن قىزعانىشتان ولتىرگەنىن ايتتى. قازا تاپقان ايەلدىڭ اناسى بالالارعا قامقورلىق جاساۋدى ءوز موينىنا العان جانە سوتتان بۇرىنعى كۇيەۋ بالاسىن قاتاڭ جازالاۋدى, سونداي-اق مورالدىق وتەماقى رەتىندە 100 ميلليون تەڭگە ءوندىرۋدى سۇرادى.

سوت ايىپتالۋشىنى كىسى ءولتىرۋ قىلمىسى ءۇشىن كىنالى دەپ تانىپ, وعان 11 جىل باس بوستاندىعىنان ايىرۋ جازاسىن تاعايىندادى. ول جازاسىن قاتاڭ رەجيمدەگى تۇزەۋ مەكەمەسىندە وتەيتىن بولادى. سونىمەن قاتار ول بۇرىنعى ەنەسىنە 10 ميلليون تەڭگە مورالدىق وتەماقى تولەۋگە مىندەتتى. ەر ادامنىڭ بۇرىن توناۋ ءۇشىن سوتتالعانى اتاپ ءوتىلدى.

سوت ۇكىمى زاڭدى كۇشىنە ەنگەن جوق.