Balalaryń bar ekeni endi esińe tústi me: Kúıeýi kesh kelgen áıelin pyshaqtap óltirdi

Foto: ashyq derekkóz

Jantúrshigerlik qylmys bıyl 21 maýsymda Aqtóbe oblysynyń Mártók aýylynda bolǵan. Kúıeýi óz áıelin qyzǵanyshtan pyshaqtap, óltirdi. Onyń jaq súıegin jáne buǵanasyn syndyrǵan dep habarlaıdy Qandastar.kz.

21 maýsymda keshki saǵat 22:00 shamasynda er adam balalaryn uıyqtatyp, áıeline qońyraý shalyp, qaıda júrgenin jáne qashan úıge keletinin suraı bastaǵan. Áıeli áriptesterimen qydyryp júrgenin jáne keıinirek keletinin aıtqan. Biraz ýaqyttan keıin er adam terezeden áıeliniń kólikten túsip, aýlaǵa kirgenin kórgen. Osy ýaqyt aralyǵynda Ishimdik iship alǵan kúıeýi as úıden pyshaq alyp, aýlaǵa shyǵyp, áıelin balaǵattaı bastaıdy. «Nege qańǵyryp júrsiń? Balalaryńnyń bary endi esińe tústi me? » – dep áıelimen janjaldasyp ketken.

Erli-zaıyptylar arasynda janjal kezinde kúıeýi áıelin shashynan ustap turyp, moınyna pyshaq suǵyp alǵan. Áıeli jerge qulaǵannan keıin de denesiniń ár jerine birneshe ret pyshaq jaraqatyn salǵan.

Keıin sarapshylar marqumnyń denesinen kóptegen pyshaq jaraqatyn, jaq súıegi men buǵanasynyń synǵanyn anyqtaǵan. Alǵan jaraqattarynan áıel sol jerde qaza tapqan.

Er adam kórshisi men marqumnyń anasy júgirip shyqqannan keıin ǵana toqtaǵan. Sotta sóz sóılep, sol qaıǵyly keshte marqum birneshe ret qońyraý shalyp, balalaryn tekserýdi suraǵanyn jáne qaladan aýylǵa taksı taba almaı júrgenin aıtqanyn baıandady.

Sottalýshy óz kinásin moıyndap, áıelin qyzǵanyshtan óltirgenin aıtty. Qaza tapqan áıeldiń anasy balalarǵa qamqorlyq jasaýdy óz moınyna alǵan jáne sottan burynǵy kúıeý balasyn qatań jazalaýdy, sondaı-aq moraldyq ótemaqy retinde 100 mıllıon teńge óndirýdi surady.

Sot aıyptalýshyny kisi óltirý qylmysy úshin kináli dep tanyp, oǵan 11 jyl bas bostandyǵynan aıyrý jazasyn taǵaıyndady. Ol jazasyn qatań rejımdegi túzeý mekemesinde óteıtin bolady. Sonymen qatar ol burynǵy enesine 10 mıllıon teńge moraldyq ótemaqy tóleýge mindetti. Er adamnyń buryn tonaý úshin sottalǵany atap ótildi.

Sot úkimi zańdy kúshine engen joq.