«بالامدى تاني المادىم»: ورالدا توكقا ءتۇسىپ مەرت بولعان بالانىڭ اناسى سۇمدىق دەرەك ايتتى

30 ءساۋىر كۇنى كەشكىسىن ورالداعى يساتاي-ماحامبەت كوشەسىندەگى №82 ءۇيدىڭ ماڭىندا قايعىلى جاعداي ورىن الدى. كۋاگەرلەردىڭ ايتۋىنشا, بالانىڭ دوبى ەلەكتر سىمدارىنا ءىلىنىپ قالعان. ول دوبىن الماق بولىپ ەلەكتر قوسالقى ستانتسياسىنىڭ شاتىرىنا شىققان. ارتىنشا بالانى توق سوققان. بالا وبلىستىق بالالار اۋرۋحاناسىنا جەتكىزىلگەن.

دەنساۋلىق ساقتاۋ باسقارماسىنىڭ مالىمەتىنشە, بالانىڭ دەنەسىنىڭ 95 پايىزى كۇيىپ, ءتورتىنشى دارەجەلى كۇيىك العان. دارىگەرلەر جاعدايىن اسا اۋىر دەپ باعالاعان. 1 مامىر كۇنى بالا كوز جۇمدى. پوليتسيا بۇل وقيعا بويىنشا سوتقا دەيىنگى تەرگەۋدى باستادى.

9 جاستاعى انۋار راحيموۆتىڭ اناسى تۇرسىنگۇل بيسەكەنوۆا بولعان وقيعانىڭ ەگجەي-تەگجەيىن ايتىپ بەردى. ول 30 ءساۋىر كۇنى بالاسىن مەكتەپتەن الىپ كەلگەنىن, تاماق ءىشىپ, كيىمىن اۋىستىرعان سوڭ, بالاسى كوشەگە ويناۋعا شىققانىن ايتتى.

«ساعات 19:00-دە شىقتى, ال 19:20-دا ۇلكەن ۇلىما دوستارى تەلەفون شالىپ, ء«ىنىڭ قۇلاپ قالدى, جەدەل جاردەم شاقىرىلدى» دەپ حابارلاعان. قۇلادى دەپ ويلادىق, بىراق بۇلاي بولادى دەپ ەشكىم كۇتپەدى. ءبارىمىز دالاعا جۇگىرىپ شىقتىق. بالام جەردە جاتتى. دەنەسى جالاڭاش, تۇگەلدەي كۇيىپ كەتكەن. ساۋ جەرى قالماعان. بىراق ول كەزدە ءالى ءتىرى ەدى», – دەيدى بالانىڭ اناسى.

اناسىنىڭ ايتۋىنشا, انۋار دوستارىمەن بىرگە فۋتبول ويناپ جۇرگەن. دوپ ەلەكتر قوسالقى ستانتسياسىنىڭ شاتىرىنا ءتۇسىپ كەتكەن.

«بالام سول قوسالقى ستانتسيا جانىنداعى اعاشقا سۇيەنىپ, جانىندا تۇرعان اعاش تاقتاي ارقىلى شاتىرعا شىققان. دوپتى تەۋىپ جەرگە تۇسىرگەن. شاتىردان ەمەس, ەكىنشى جاعىنان تۇسپەك بولعان. 10 مىڭ ۆولتتىق توق وتەتىن جەرگە اياعى ءىلىنىپ, توققا جالعانعان تروستى ۇستاپ قالعان. قاسىندا بولعان بالالار ايقايلاپ, كومەككە شاقىرعان. ارتىنشا ءورت شىعىپ, بالام كۇيىپ قالعان», – دەيدى تۇرسىنگۇل بيسەكەنوۆا.

العاشقىلاردىڭ ءبىرى بولىپ كومەككە ءبىر ەر ادام ونى جەرگە ءتۇسىرىپ, كيىمدەرىن شەشۋگە تىرىسقان.

«بۇكىل دەنەسى قارا كۇيە بولدى. دالاعا جۇگىرىپ شىقتىم, ءوز بالامدى تاني المادىم. جانۇشىرا تەك كومەك كورسەتۋدى, اۋرۋحاناعا جەتكىزۋدى سۇرادىم», – دەيدى اناسى.

دارىگەرلەر ونىڭ ءومىرى ءۇشىن ەكى كۇن كۇرەسكەن. ءبىرىنشى كۇنى ونىڭ وڭ قولى مەن وڭ اياعىن كەسۋگە تۋرا كەلگەن. ال ەكىنشى كۇنى كەشكى ساعات 22:30-دا بالا كوز جۇمدى.

اناسىنىڭ ايتۋىنشا, كوپقاباتتى ءۇيدىڭ اينالاسىندا قاۋىپسىزدىك ەرەجەلەرى ساقتاماعانىن ايتتى.

ء«ۇيدىڭ الدىندا بۇرىن ويىن الاڭى بولعان. ەرەسەكتەۋ بالالار ول جەردە ويناي المايدى. ويتكەنى الاڭشا تەك كىشكەنتاي بالالارعا ارنالعان. ال ۇلكەنىرەك بالالارعا وينايتىن جەر جوق. ولار ءۇيدىڭ ارتىندا, قوقىس جاشىكتەرىنىڭ جانىندا, قولدان جاسالعان قاقپالارمەن فۋتبول وينايدى. ول جەر قورشالۋى كەرەك ەدى. تىم بولماسا ءتورت مەترلىك تور ورناتىپ قويۋ كەرەك بولاتىن. نەمەسە قوسالقى ستانتسيانى قورشاۋ كەرەك ەدى», – دەدى بالانىڭ اناسى.

تۇرسىنگۇل بيسەكەنوۆا مەملەكەتتىك ورگانداردىڭ نەمقۇرايلىلىعىنا اشۋلى.

«مەملەكەتتىك ورگاندار قايدا قاراپ وتىر? «گورسۆەت» قايدا? تج قىزمەتى قايدا? جانىندا تۇرعان اعاشتىڭ ۇستىندە سىمدار ءىلىنىپ تۇر. نايزاعاي تۇسسە, بۇكىل ءۇي جانىپ كەتۋى مۇمكىن. مەن بۇنى جايىنا قالدىرمايمىن. بىرەۋ بۇل ءۇشىن جاۋاپ بەرۋى كەرەك. ءبىز سالىق تولەيمىز, كسك-عا اقشا تولەيمىز. بۇل اعاشتى كەسىپ تاستاۋ كەرەك ەدى. بارىنە ءبارىبىر», – دەيدى تۇرسىنگۇل بيسەكەنوۆا.