«بالامنىڭ تەگى بولعانىن قالايمىن»: ماڭعىستاۋ وبلىسى اكىمىنەن ۇلدى بولدىم دەگەن ايەل ۇندەۋ جاسادى

بۇرىنعى ءماسليحات دەپۋتاتى ماڭعىستاۋ وبلىسىنىڭ اكىمىنەن ۇل تاپتىم دەپ, ومىردەن تۇڭىلگەنىن اشىق ايتتى. ەكس-دەپۋتاتتىڭ بۇل مالىمدەمەسى قوعامدا ۇلكەن رەزونانس تۋدىرىپ وتىر, دەپ حابارلادى Qandastar.kz سايتى Skifnews.kz اقپارات پورتالىنا سىلتەمە جاساپ.

«ادايدىڭ قىزىمىن, قوسايدىڭ ۇرپاعىمىن. ءوزىمدى باسىندىرىپ قويۋدان شارشادىم, قانشا مىقتى بولۋعا تىرىسسام دا قولىمنان كەلمەي جاتىر. قاتەلىگىمدى مويىندادىم. 3 جاسار ۇلىم امىرەنىڭ قۇقىعىن قورعاپ ءجۇرمىن. 10 ماۋسىمدا سوتقا بەردىم, ودان بەرى ەكى اي ءوتتى, ءالى ەش ناتيجە جوق, دنق دا جاساعان جوقپىز», — دەيدى ول.

سونىمەن قاتار كەلىنشەك بالاسىنىڭ بولاشاعىنا الاڭدايتىنىن ايتىپ, تەگىنە قاتىستى ءسوز قوزعادى.

« ۇلىم كىشكەنتاي كەزىندە وسى ماسەلەنىڭ ءبارى بىتسە ەكەن دەيمىن, ەسەيگەندە ەش ماسەلە بولماسا ەكەن دەيمىن. بالامنىڭ تەگى بولعانىن قالايمىن, تۋمالاستارىمەن ارالاسسا جاقسى بولار ەدى. بالامنىڭ اكەسىنىڭ اتا-اناسىنىڭ ەش جازىعى جوق, ولار بالاسىن وسىلاي بولسىن دەپ تاربيەلەمەيدى. مەندە بارار جەر, باسار تاۋ قالمادى. كوپ سۇراقتىڭ جاۋابى جوق», — دەپ جانايقايىن جەتكىزدى كەلىنشەك.

ول ءوزىنىڭ ىشكى كۇيزەلىسى مەن اداسقانىن ايتىپ, بار شىندىعىن ءبولىستى.