«بالاڭا كەسىرىڭدى تيگىزبەسەي»: بەلگىلى پروديۋسەر اقبوتا كەرىمبەكوۆانى ۇلىمەن بوپسالادى

فوتو: اشىق دەرەككوز

Qazaqstan ۇلتتىق ارناسىندا 13 جۇپ ءوزارا باق سىنايتىن «جۇلدىزدى جۇپ» باعدارلاماسىنىڭ كورەرمەندەرگە جول تارتقانى كوپ بولا قويعان جوق. سوندا دا باستالماي جاتىپ, باعدارلاما توڭىرەگىندە شۋ شىعىپ ۇلگەردى. تانىمال ءانشى اقبوتا كەرىمبەكوۆا ءوزىنىڭ الەۋمەتتىك پاراقشاسىندا Qazaqstan تەلەراديو كەشەنىنىڭ باسقارما ءتورايىمى ءلاززات تانىسبايعا ۇندەۋ جاسادى, دەپ حابارلادى Qandastar.kz.

«بۇگىن Qazaqstan ۇلتتىق ارناسىنىڭ «جۇلدىزدى جۇپ» جوباسىنىڭ كەزەكتى تۇسىرىلىمىنە الماتىدان استاناعا ۇشىپ كەلدىك. ءبىراز بۇرىن باعدارلامانى ۇيىمداستىرۋشىلار ماعان حابارلاسىپ, SAAD مەيمانحاناسىنا بولمە بروندالعانىن ايتتى. سول جاققا بارسام, «سىزگە ورىن بروندالماعان» دەپ تۇر.بىردەن جاۋاپتى قىزدارعا حابارلاسىپ, ءمان-جايدى ءتۇسىندىرىپ, ءوزىمنىڭ قاتتى اۋىرىپ كەلگەنىمدى, ماسەلەنى تەزىرەك شەشۋىن سۇرادىم. «باسقا جەرگە اۋىسساڭىز» دەدى. كوشىپ-قونىپ جۇرۋگە شامامنىڭ بولماي تۇرعانىن ايتىپ, ءسال نازىمدى جەتكىزدىم. ءبىر كەزدە اتى-ءجونى جوق, جوبا پروديۋسەرى, «ايگىلى» دينارا ادام حابارلاسىپ, جەكىپ, «يا ۋستالا ۋجە وت ۆسەح ەتيح كاپريزوۆ, ۆسە ۆاشي كاپريزى ۋ مەنيا ۆىشە گولوۆا ستويات. حوچەش, ۋحودي نا ح*ر يز ەتوگو پروەكتا». بۇل ونىڭ ايتقانى. ءدال وسىلاي!» – دەيدى اقبوتا كەرىمبەك.

ول «قارىنىمنىڭ اشقانىنا ەمەس, قادىرىمنىڭ قاشقانىنا ناليمىن» دەپ وتىر. ۇلت بولعالى ماڭدايىمىزعا بۇيىرعان جالعىز ۇلتتىق ارنامىزدىڭ ماڭدايالدى جوبالارىنا الاش تۇگە, ادامنىڭ قادىرىن بىلمەيتىن, بىردە-ءبىر رەت قازاقشا ويلانىپ, وي قورىتىپ كورمەگەن بىرەۋلەر جەتەكشىلىك ەتكەن سوڭ, كورگەن كۇن وسى ەكەن دەيدى.

«قازىر قوعامدا ءتول ارنالارىمىزدىڭ وسى تەكتەس مۋزىكالىق جوبالارىنا سىن كوپ. «تۇرقى جوق ءانشى, سۇرقى جوق ءسوز, ۇلتى جوق ءان قاپتادى» دەپ وكپەلەيدى حالىق. 30 جىلعا جۋىق قازاقتىڭ عانا ءانىن ايتىپ, ساحنادا جۇرگەن انشىلەردى وسىلاي «پوسلات» ەتە بەرسە, ءان ونەرىنە قىزمەت ەتۋگە كىمدە ق ۇلىق بولادى دەيسىز? جەكە وزىمە بۇل جوبا تۇك تە قىزىق ەمەس, تەك, «مەن بولماسام, كىم? ءوز اۆتورلارىمنىڭ تۋىندىلارى حالىققا جەتە بەرسىن. جاسىمدى, جولىمدى پۇلداپ مەن قاتىسپاسام, مەنىڭ ورىنىما ءشوپتى دە, شوڭگەنى دە ولەڭ عىپ جۇرگەن بىرەۋ تابىلادى عوي» دەگەن ويمەن شاقىرۋلارىنا كەلىسىم بەرگەنمىن. بۇعان دەيىن بۇل جوبادان, بۇل پروديۋسسەرلىك قۇرامنان ءبىر تيىن گونورار دا الىپ كورمەگەنمىن. وزگە ەلدەن كەلەتىن «ايدىك» انشىلەردەي رايدەر دە قويمايمىز. قاراپايىم كۇتىپ الۋ ادەبىن ساقتاسا, مەنىڭ بۇلاردا نەم بار? سونىسىمەن قويماي, اناداي ءسوز ايتادى!.. بۇل كىم سوندا?!», – دەيدى ءانشى.

سوسىن, بايقايمىن, وسىنداي اقشالى جوبالاردى تەك وسى دينارا ادام ۇتىپ الادى. بۇعان دەيىن نە ۇلتتىق ارناعا, نە ۇلتقا بەرەرى بار جوباسى بولماسا دا!.. بۇل كۇمان تۋدىرماي ما? جالپى, تەلەارنا جاريالايتىن تەندەردى ۇتىپ الۋدىڭ رەسمي, بەيرەسمي جولدارى قانداي? بۇل جوباعا قانشا ءبولىندى, ودان قاتىسۋشىلارعا قالاماقى, دۇرىس جاتىن ورىن قارالماسا, وندا, مەملەكەت قارجىسى قايدا كەتىپ جاتىر? قازاقى انشىلەردى «مامبەت» سانايتىن, قازاق رۋحانياتىنا قوسقان تيتىمدەي ۇلەسى جوق دينارا ادامعا بار جوبانى ۇتىپ الا بەرەتىن كۇش قايدان, قالاي بىتكەن, وسىعان دەيىنگى اتقارعان جۇمىستارىنىڭ ەسەبى قانداي دەگەن ساۋالدار دا مەنى ويلاندىرا باستادى. سوسىن, ەڭ ۇلى رەجيسسەرلەردى دايىندايتىن كەلندەگى ۋنيۆەرسيتەتتە پروفەسسور بولعان بولات اتاباەۆتىڭ تۋعان جەرىندە ۇلتتىق ارنانىڭ ءبىر مۋزىكالىق جوباسىن جاساي الاتىن رەجيسسەر جوقتاي, وسى دينارانىڭ شەشىمىمەن رەسەيدەن, ۋكراينادان, ت.ب. شەت ەلدەن رەجيسسەرلەردىڭ كەلىپ, حالىقتىڭ بالەنباي اقشاسىن قالتاسىنا باسىپ, ءبىزدىڭ ونەرگە جاساپ جۇرگەن «قىزمەتىن» قاي دەڭگەيدە باعالاۋعا بولادى دەگەن سۇراق تا مەنىڭ كوكەيىمدە تۇر. «سپورتىمىزدى لەگيونەرلەر قۇلدىراتتى» دەپ زار قاقساپ جاتىرمىز, ال تەلەديدارىمىزدى شە?..

وسى رەتتە, مەن, كوپ ءارتىستىڭ «اۋزىنىڭ ۇشىندا» جۇرگەن ساۋالدى, وسى ءوز ۇندەۋىمدى ۇلتتىق ارنانىڭ باسقارما ءتورايىمى ءلاززات تانىسبايعا تىكەلەي جولداعىم كەلەدى. قارجىلىق بولىنىستەر مەن ونىڭ ورىندى, ءتيىمدى جۇمسالۋى بويىنشا تەكسەرۋشى ورگاندارعا دا وسى ءۇنىم جەتسە دەيمىن! قۇرمەتپەن, اقبوتا كەرىمبەكوۆا», – دەلىنگەن حابارلامادا.

اقبوتا كەرىمبەكوۆا وسى جاعدايعا بايلانىستى ۇلىنا حابارلاسىپ, قىر كورسەتكەندەرىن مالىمدەدى.

«قولداپ, ءۇن قوسىپ جاتقان ارقايسىڭىزعا العىسىم شەكسىز! انا جاقتا ديناراجان بالاما حابارلاسىپ, «ماماڭ كوپ بولسا 3 كۇن شۋلاتار, ال مەن قانشا جوبا جاسايمىن, سەنىڭ جولىڭدى جاپپاسىن دا» دەپ ايتادى دەيدى. باعانا دا «بالاڭا كەسىرىڭدى تيگىزبەسەي» دەپ ماعان قىر كورسەتكەن. قوعامدا «نەگە شىن تالانتتار تانىلمايدى, تاسادا قالىپ قويادى?» دەگەن ساۋال كوپ. جاۋابى – وسى! تالانتتى ادامداردا قۇداي جاراتقان مىنەز بولاتىنى ايان! ءسويتىپ ءجۇرىپ, بىرەۋگە ۇناماي قالساڭ, جولىڭ ومىرلىككە جابىلادى. كون, كونبە, سەن, سەنبە, جاعداي – وسى!», – دەپ جازدى ءانشى.

ايتا كەتەيىك, بەلگىلى ءانشى ءوزىنىڭ الەۋمەتتىك پاراقشاسىندا الماتىدان استاناعا ۇشىپ كەتكەنىن دە جاريالاعان.