«Balańa kesirińdi tıgizbeseı»: Belgili prodıýser Aqbota Kerimbekovany ulymen bopsalady

Foto: ashyq derekkóz

Qazaqstan ulttyq arnasynda 13 jup ózara baq synaıtyn «Juldyzdy jup» baǵdarlamasynyń kórermenderge jol tartqany kóp bola qoıǵan joq. Sonda da bastalmaı jatyp, baǵdarlama tóńireginde shý shyǵyp úlgerdi. Tanymal ánshi Aqbota Kerimbekova óziniń áleýmettik paraqshasynda Qazaqstan teleradıo kesheniniń basqarma tóraıymy Lázzat Tanysbaıǵa úndeý jasady, dep habarlady Qandastar.kz.

«Búgin Qazaqstan ulttyq arnasynyń «Juldyzdy jup» jobasynyń kezekti túsirilimine Almatydan Astanaǵa ushyp keldik. Biraz buryn baǵdarlamany uıymdastyrýshylar maǵan habarlasyp, SAAD meımanhanasyna bólme brondalǵanyn aıtty. Sol jaqqa barsam, «sizge oryn brondalmaǵan» dep tur.Birden jaýapty qyzdarǵa habarlasyp, mán-jaıdy túsindirip, ózimniń qatty aýyryp kelgenimdi, máseleni tezirek sheshýin suradym. «Basqa jerge aýyssańyz» dedi. Kóship-qonyp júrýge shamamnyń bolmaı turǵanyn aıtyp, sál nazymdy jetkizdim. Bir kezde aty-jóni joq, joba prodıýseri, «áıgili» Dınara Adam habarlasyp, jekip, «ıa ýstala ýje ot vseh etıh kaprızov, vse vashı kaprızy ý menıa vyshe golova stoıat. Hochesh, ýhodı na h*r ız etogo proekta». Bul onyń aıtqany. Dál osylaı!» – deıdi Aqbota Kerimbek.

Ol «qarynymnyń ashqanyna emes, qadirimniń qashqanyna nalımyn» dep otyr. Ult bolǵaly mańdaıymyzǵa buıyrǵan jalǵyz ulttyq arnamyzdyń mańdaıaldy jobalaryna Alash túge, adamnyń qadirin bilmeıtin, birde-bir ret qazaqsha oılanyp, oı qorytyp kórmegen bireýler jetekshilik etken soń, kórgen kún osy eken deıdi.

«Qazir qoǵamda tól arnalarymyzdyń osy tektes mýzykalyq jobalaryna syn kóp. «Turqy joq ánshi, surqy joq sóz, ulty joq án qaptady» dep ókpeleıdi halyq. 30 jylǵa jýyq qazaqtyń ǵana ánin aıtyp, sahnada júrgen ánshilerdi osylaı «poslat» ete berse, án ónerine qyzmet etýge kimde qulyq bolady deısiz? Jeke ózime bul joba túk te qyzyq emes, tek, «men bolmasam, kim? О́z avtorlarymnyń týyndylary halyqqa jete bersin. Jasymdy, jolymdy puldap men qatyspasam, meniń orynyma shópti de, shóńgeni de óleń ǵyp júrgen bireý tabylady ǵoı» degen oımen shaqyrýlaryna kelisim bergenmin. Buǵan deıin bul jobadan, bul prodıýsserlik quramnan bir tıyn gonorar da alyp kórmegenmin. О́zge elden keletin «áıdik» ánshilerdeı raıder de qoımaımyz. Qarapaıym kútip alý ádebin saqtasa, meniń bularda nem bar? Sonysymen qoımaı, anadaı sóz aıtady!.. Bul kim sonda?!», – deıdi ánshi.

Sosyn, baıqaımyn, osyndaı aqshaly jobalardy tek osy Dınara Adam utyp alady. Buǵan deıin ne ulttyq arnaǵa, ne ultqa bereri bar jobasy bolmasa da!.. Bul kúmán týdyrmaı ma? Jalpy, telearna jarııalaıtyn tenderdi utyp alýdyń resmı, beıresmı joldary qandaı? Bul jobaǵa qansha bólindi, odan qatysýshylarǵa qalamaqy, durys jatyn oryn qaralmasa, onda, memleket qarjysy qaıda ketip jatyr? Qazaqy ánshilerdi «mambet» sanaıtyn, Qazaq rýhanııatyna qosqan tıtimdeı úlesi joq Dınara Adamǵa bar jobany utyp ala beretin kúsh qaıdan, qalaı bitken, osyǵan deıingi atqarǵan jumystarynyń esebi qandaı degen saýaldar da meni oılandyra bastady. Sosyn, eń uly rejısserlerdi daıyndaıtyn Kelndegi ýnıversıtette professor bolǵan Bolat Atabaevtyń týǵan jerinde ulttyq arnanyń bir mýzykalyq jobasyn jasaı alatyn rejısser joqtaı, osy Dınaranyń sheshimimen Reseıden, Ýkraınadan, t.b. shet elden rejısserlerdiń kelip, halyqtyń bálenbaı aqshasyn qaltasyna basyp, bizdiń ónerge jasap júrgen «qyzmetin» qaı deńgeıde baǵalaýǵa bolady degen suraq ta meniń kókeıimde tur. «Sportymyzdy legıonerler quldyratty» dep zar qaqsap jatyrmyz, al teledıdarymyzdy she?..

Osy rette, men, kóp ártistiń «aýzynyń ushynda» júrgen saýaldy, osy óz úndeýimdi Ulttyq arnanyń basqarma tóraıymy Lázzat Tanysbaıǵa tikeleı joldaǵym keledi. Qarjylyq bólinister men onyń oryndy, tıimdi jumsalýy boıynsha tekserýshi organdarǵa da osy únim jetse deımin! Qurmetpen, Aqbota Kerimbekova», – delingen habarlamada.

Aqbota Kerimbekova osy jaǵdaıǵa baılanysty ulyna habarlasyp, qyr kórsetkenderin málimdedi.

«Qoldap, ún qosyp jatqan árqaısyńyzǵa alǵysym sheksiz! Ana jaqta Dınarajan balama habarlasyp, «mamań kóp bolsa 3 kún shýlatar, al men qansha joba jasaımyn, seniń jolyńdy jappasyn da» dep aıtady deıdi. Baǵana da «balańa kesirińdi tıgizbeseı» dep maǵan qyr kórsetken. Qoǵamda «nege shyn talanttar tanylmaıdy, tasada qalyp qoıady?» degen saýal kóp. Jaýaby – osy! Talantty adamdarda Qudaı jaratqan minez bolatyny aıan! Sóıtip júrip, bireýge unamaı qalsań, jolyń ómirlikke jabylady. Kón, kónbe, sen, senbe, jaǵdaı – osy!», – dep jazdy ánshi.

Aıta keteıik, belgili ánshi óziniń áleýmettik paraqshasynda Almatydan Astanaǵa ushyp ketkenin de jarııalaǵan.