جاڭالىقتار
بالانى كەشىرگەن: پەتروپاۆلدا وقۋشى قىز قاعىپ كەتكەن سوعىس ارداگەرى قايتىس بولدى
فوتو: وتباسىلىق مۇراعاتتان
سولتۇستىك قازاقستان وبلىسىنىڭ تۋماسى, ۇلى وتان سوعىسىنىڭ ارداگەرى ۆاسيلي ۆاسيلەۆيچ ماكيەنكو 100 جاسىنا قاراعان شاعىندا ومىردەن ءوتتى, دەپ جازدى qandastar.kz
قاريا قالالىق كوپبەيىندى اۋرۋحانادا كوز جۇمدى. بۇل تۋرالى Stan.kz اقپارات اگەنتتىگى حابارلايدى.
دارىگەرلەر 30 مينۋت بويى رەانيماتسيالىق شارالار جۇرگىزگەن. الايدا ارداگەردىڭ ءومىرىن امان الىپ قالۋ مۇمكىن بولمادى.
ۆاسيلي ماكيەنكو 1926 جىلى 24 قاڭتاردا ۆولوشينكا اۋىلىندا دۇنيەگە كەلگەن. 1943 جىلى 17 جاسىندا اسكەرگە شاقىرىلىپ, 44-ءشى جانە 142-ءشى اتقىشتار پولكىندە, كەيىن 317-ءشى گۆارديالىق اتقىشتار پولكىندە قىزمەت ەتتى. سوعىستاعى ەرلىگى ءۇشىن II دارەجەلى وتان سوعىسى وردەنىمەن, «كيونيگسبەرگتى العانى ءۇشىن» جانە «گەرمانيانى جەڭگەنى ءۇشىن» مەدالدارىمەن ماراپاتتالعان.
سوعىستان كەيىن ۆاسيلي ۆاسيلەۆيچ سۋ قۇبىرى شارۋاشىلىعىندا ەڭبەك ەتىپ, كەيىن 13 جىل بويى تەحنيكالىق جابدىقتاۋ باسقارماسىندا باسشىنىڭ ورىنباسارى قىزمەتىن اتقاردى. ول ءتورت قىز, سەگىز نەمەرە جانە التى شوبەرە تاربيەلەپ وسىرگەن.
قايعىلى جاعداي بيىل 20 ساۋىردە بولعان. ۆاسيلي ماكيەنكو سەرۋەندەۋگە شىعىپ, ادەتتەگىدەي كوگەرشىندەردى تاماقتاندىرۋعا بارعان. جول قيىلىسىندا ول جۇگىرىپ وتپەك بولعان توعىز جاستاعى مەكتەپ وقۋشىسىمەن سوقتىعىسىپ قالادى. ارداگەر قۇلاپ, جامباس سۇيەگى سىنعان.
اۋرۋحاناعا جاتقاننان كەيىن ماكيەنكو تراۆماتولوگيا بولىمىندە جاتتى. كەيىن جانساقتاۋ بولىمىنە اۋىستىرىلدى. دارىگەرلەردىڭ بار كۇش-جىگەرىنە قاراماستان, ارداگەردى امان الىپ قالۋ مۇمكىن بولمادى.
كەيىن قىز بالا قارت كىسىنى بايقاماعانىن جانە ونىمەن سوقتىعىسقانىن تۇسىنبەگەنىن ايتقان. كەلەسى كۇنى ول اناسى ەكەۋى اۋرۋحاناعا بارىپ, گۇل اپارىپ, ۆاسيلي ماكيەنكودان كەشىرىم سۇراعان. ارداگەر ولاردى كەشىرگەن.
وقيعا بويىنشا پوليتسيا قر قىلمىستىق كودەكسىنىڭ 114-بابى «دەنساۋلىققا ابايسىزدا زيان كەلتىرۋ» بويىنشا سوتقا دەيىنگى تەرگەۋدى باستاعان.
«پوليتسيا ۇلى وتان سوعىسىنىڭ 99 جاستاعى ارداگەرى ۆاسيلي ۆاسيلەۆيچ ماكيەنكونىڭ اۋىر جاراقات الۋىنىڭ ءمان-جايىن انىقتاۋ ءۇشىن تەكسەرۋ جۇرگىزدى. 20 ساۋىردە ونىڭ اۋرۋحاناعا تۇسكەنى تۋرالى حابار كەلىپ تۇسكەننەن كەيىن, پوليتسيا قىزمەتكەرلەرى بولعان جايتتىڭ بارلىق ءمان-جايىن انىقتاۋعا باعىتتالعان قاجەتتى تەرگەۋ ارەكەتتەرىن جۇرگىزدى. تەكسەرۋ بارىسىندا وقيعانىڭ قاتىسۋشىلارى مەن كۋاگەرلەرى انىقتالدى, وقيعا پەتروپاۆل قالاسىنداعى نازارباەۆ پەن مۇسرەپوۆ كوشەلەرىنىڭ قيىلىسىندا بولعانى بەلگىلى بولدى. كۋاگەرلەردىڭ تۇسىنىكتەمەلەرى مەن وقيعا جاعدايلارى ەگجەي-تەگجەيلى زەردەلەندى,» – دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى.
قىلمىستىق ءىس كامەلەتكە تولماعان قاتىسۋشىنىڭ ارەكەتتەرىندە قىلمىستىق قۇقىقبۇزۋشىلىق قۇرامىنىڭ بولماۋىنا بايلانىستى توقتاتىلدى.
«9 جاستاعى قىز بالا قىلمىستىق جاۋاپكەرشىلىك جۇكتەلەتىن جاسقا تولماعان», – دەپ ءتۇسىندىردى پوليتسيا وكىلدەرى.
ايتا كەتەيىك, 5 مامىردا پەتروپاۆلدا ۇوس تاعى ءبىر ارداگەرى ۆالەنتينا ۆولكوداۆ قايتىس بولعان ەدى. قازىر سولتۇستىك قازاقستاندا ۇلى وتان سوعىسىنا قاتىسقان جالعاز عانا ادراگەر قالدى. ول — فەدور ششەگلوۆ.
