بالانى جىلاتىپ نە ىستەپ تۇر – بالاسىمەن ءان ايتىپ اقشا تاپقان انا جەلىدە سىنعا قالدى

فوتو: ۆيدەو كادرى

الماتى كوشەلەرىندە شيەتتەي بالالارىن قاسىنا ەرتىپ, ءان ايتىپ جان باعىپ جۇرگەن انا الەۋمەتتىك جەلىدە كوپشىلىكتىڭ سىنىنا قالدى, دەپ حابارلايدى Ulysmedia.kz.

الماتى كوشەلەرىنىڭ بىرىندە تۇندەلەتىپ, بەلگىلى ءانشى-سازگەر گاۋھار الىمبەكوۆانىڭ «پەرزەنت سىرى» ءانىن ورىنداپ تۇرعان انانىڭ كىم ەكەنى, قاي جاقتان كەلگەنى بەلگىسىز.

ۆيدەودا قولىنداعى بالاسىنىڭ جىلاپ تۇرعانى بايقالادى. ال قولارباسىنىڭ الدىن جاۋىپ, قىمتاپ قويعانىنا قاراعاندا تاعى ءبىر نارەستەسى بار سياقتى.

ۆيدەوعا قاتىستى جازىلعان پىكىرلەر ەكىگە جارىلعان. ءبىر تاراپ بالاسىن جىلاتىپ, كوشەدە نە ىستەپ جۇرگەنىنىنە كەيىپ, «باسقا جۇمىس تاپپاي ما» دەگەن سياقتى سىن ايتسا, ءبىر تاراپ جاناشىرلىق تانىتىپ, تىلەگىن جاۋدىرىپ, كومەك قولىن سوزۋعا نيەت بىلدىرگەن.

«جانىم-اي, ءان ايتىپ بالامەن ناپاقاسىن تاۋىپ جۇرگەن مىقتى ايەل ەكەنسىز. عۇمىر-جاسىڭىز ۇزاق بولسىن, اپكە», دەپتى ءبىر پىكىر يەسى.

ەندى ءبىرى قيساپسىز قارجى شاشىپ جۇرگەن بلوگەرلەرگە قاراتىپ, «وسىنداي كىسىلەرگە كومەكتەسىپ جىبەرسە عوي, كۇن سۋىقتا بالاعا وبال» دەپ جاتىر.

تاعى ءبىر تاراپ انا مەن بالانى وسىنداي كۇيگە تۇسىرگەن اكەنى, قالا بەردى ەلدەگى جۇمىسسىزدىقتى تۇبەگەيلى شەشە الماي وتىرعان ۇكىمەتتى قاتاڭ سىنعا العان.

سونداي-اق بانكتىك ەسەپ-شوتىن سۇراپ, ءتىپتى «بالاڭدى قاراپ بەرەيىن, الاڭسىز اقشا تاۋىپ ال» دەگەن مەيىرىمگە تولى پىكىرلەر دە از ەمەس.

ەڭ باستىسى جەلى قولدانۋشىلارى ءانشى انانىڭ تاماشا داۋسىنا تامسانىپ جاتىر.