Balany jylatyp ne istep tur – balasymen án aıtyp aqsha tapqan ana jelide synǵa qaldy

Foto: Vıdeo kadry

Almaty kóshelerinde shıetteı balalaryn qasyna ertip, án aıtyp jan baǵyp júrgen ana áleýmettik jelide kópshiliktiń synyna qaldy, dep habarlaıdy Ulysmedia.kz.

Almaty kósheleriniń birinde túndeletip, belgili ánshi-sazger Gaýhar Álimbekovanyń «Perzent syry» ánin oryndap turǵan ananyń kim ekeni, qaı jaqtan kelgeni belgisiz.

Vıdeoda qolyndaǵy balasynyń jylap turǵany baıqalady. Al qolarbasynyń aldyn jaýyp, qymtap qoıǵanyna qaraǵanda taǵy bir nárestesi bar sııaqty.

Vıdeoǵa qatysty jazylǵan pikirler ekige jarylǵan. Bir tarap balasyn jylatyp, kóshede ne istep júrgeninine keıip, «basqa jumys tappaı ma» degen sııaqty syn aıtsa, bir tarap janashyrlyq tanytyp, tilegin jaýdyryp, kómek qolyn sozýǵa nıet bildirgen.

«Janym-aı, án aıtyp balamen nápaqasyn taýyp júrgen myqty áıel ekensiz. Ǵumyr-jasyńyz uzaq bolsyn, ápke», depti bir pikir ıesi.

Endi biri qısapsyz qarjy shashyp júrgen blogerlerge qaratyp, «Osyndaı kisilerge kómektesip jiberse ǵoı, kún sýyqta balaǵa obal» dep jatyr.

Taǵy bir tarap ana men balany osyndaı kúıge túsirgen ákeni, qala berdi eldegi jumyssyzdyqty túbegeıli sheshe almaı otyrǵan Úkimetti qatań synǵa alǵan.

Sondaı-aq banktik esep-shotyn surap, tipti «balańdy qarap bereıin, alańsyz aqsha taýyp al» degen meıirimge toly pikirler de az emes.

Eń bastysy jeli qoldanýshylary ánshi ananyń tamasha daýsyna tamsanyp jatyr.