«Balapan», «Kazakh tv», «حابار24» تەلەارنالارىن ءازىربايجان اۋماعىندا كورسەتۋ ماسەلەسى كوتەرىلدى

قر اقپارت جانە قوعامدىق دامۋ ءمينيسترى اسقار وماروۆ ءازىربايجان رەسپۋبليكاسى پرەزيدەنتىنىڭ كومەكشىسى – پرەزيدەنت اكىمشىلىگى ىشكى ساياسات ءبولىمىنىڭ جەتەكشىسى حيكمەت گادجيەۆ باستاعان ءازىربايجان باق سالاسىنىڭ وكىلدەرىمەن كەزدەسۋ وتكىزدى.

تالقىلانعان باستى ماسەلە – «Balapan», «Kazakh tv», «حابار24» تەلەارنالارىن ءازىربايجان اۋماعىندا كورسەتۋ.

مينيستر قازاقستاندىق نيشالىق تەلەارنالاردىڭ ءازىربايجان اۋماعىندا حابار تاراتۋىن قامتاماسىز ەتۋ ءۇشىن ناقتى شارالار قابىلداناتىنىن ايتىپ, ازىربايجاندىق مامانداردى ورتالىق ازياداعى ەڭ ءىرى مەدياوقيعا – Astana Media Week شاراسىنا شاقىردى. ءازىربايجان تاراپى قازاقستاننىڭ باق سالاسىنداعى, ونىڭ ىشىندە انيماتسيا وندىرۋدەگى تاجىريبەسىنە قىزىعۋشىلىق تانىتىپ, شاراعا قاتىسۋعا نيەتتى ەكەندىكتەرىن جەتكىزدى.

قازىرگى ۋاقىتتا «قازاقستان» تەلەراديوكورپوراتسياسىنا قاراستى «Balapan» ارناسىنان كورسەتىلەتىن كونتەنتتىڭ 80%-ىن انيماتسيالىق جوبالار قۇرايدى.