بالاسى جەتىمدەر ۇيىنەن, وزدەرى ساياسي لاگەردەن امان قالعان وتباسى

قانداستار “قاڭعىپ” جۇرسە, ءسىز قالاي قامسىز جۇرەسىز

قىركۇيەك ايىندا جاريالاعان مىنا ءبىر ماقالامىزدا بەرزات جۇماعازى ەسىمدى جاس وتباسىنىڭ قازاقستانعا زاڭدى كەلىپ, جىلدار وتە ءتۇرلى سەبەپتەرمەن قۇجاتسىز تەنتىرەپ كەتكەنى تۋرالى جازىپ ەدىك. جازىپ قانا قويماي, ءمان-جايدى كوزبەن كورىپ, «قۇر» ۋادە بەرىپ تە اتتانعانبىز. ابىروي بولعاندا, ۋادەمىز رەسپۋبليكالىق «جەبەۋ» ۇيىمىنىڭ ارالاسۋىمەن كۇنى كەشە وڭ شەشىمىن تاپتى. بۇل قۋانىشتى اتالعان ۇيىمنىڭ سايتى ءبىرىنشى بولىپ حابارلادى.


الايدا بۇل بەرزات وتباسىن تولىق قاندى قر ازاماتى بولدى دەگەندى بىلدىرمەيدى. كەرىسىنشە قىتاي حالىق رەسپۋبليكاسىنىڭ سۋ جاڭا قىزىل پاسپورتى قولعا ءتيدى دەگەن ءسوز. بىراق, مۇنىڭ وزىنە شۇكىرلىك ەتۋگە, ءسۇيىنشى سۇراۋعا تۋرا كەلىپ تۇر. سەبەبى ب.جۇماعازىنىڭ وتباسىنداعى بۇعان دەيىنگى بارلىق قۇجاتتارىنىڭ ۋاقىتى ءوتىپ, زاڭدىق تۇرعىدان مۇلدەم جارامسىز كۇيگە تۇسكەن-ءدى. زاڭعا سالساڭىز قىتاي اسىپ كەرى قايتۋدان باسقا ءلاج جوق تۇعىن. ءدال وسى تىعىرىقتان امان شىققانىنىڭ ءوزى – ءبىر ولجا. الداعى ۋاقىتتا قۇجاتتارىن امان-ەسەن قولىنا العان بەرزات وتباسىنىڭ قر ازاماتى اتانۋ تۇكتە قيىن شارۋا ەمەس. ءارى كەتسە جارتى جىلدا قازاقستاننىڭ تولقۇجاتتارىن قولدارىنا الا الاتىن بولادى. قاريالار مۇندايدى: ء«ىستىڭ بەتى وڭعا بۇرىلدى» – دەۋشى ەدى. وڭعا بۇرىلماي قايتسىن, بارلىق ماسەلە وڭ شەشىمىن تاۋىپ جاتسا…

ەرەكشە ايتا كەتەر ءبىر جاي بار. نەگىزى بەرزات شىعىس قازاقستان وڭىرىندە تۇراقتى مەكەندەگەن. قۇجاتتارىنىڭ دا ۋاقىتى سوندا وتكەن. ءتىپتى, قازاقستاندا دۇنيەگە كەلگەن بالالارى جەتىمدەر ۇيىنە تاپسىرىلىپ, وزدەرى قىتايعا قۋىلۋ قاۋپى ءتونىپ تۇرعان تۇستا, قوعام بەلسەندىسى, قانداستار اراسىندا قور قۇرىپ, قايىرىمدىلىق ءىس-شاراسىمەن اينالىسىپ جۇرگەن – باحارگۇل تابىسقىزى ەسىمدى ازاماتشا اراشا تۇسەدى. شىعىستان الدىرىپ, پاتەرىن جالداپ, ايلىق ءىشىپ-جەمىن دە ايىرىپ بەرەدى. ءتىپتى, «ادىرنا» بىرلەستىگىنىڭ ارالاسۋىنا, باق بەتىنە بەرزات وتباسىنىڭ ماسەلەسى كوتەرىلۋىنە دەيىن وسى ازاماتشانىڭ تىكەلەي ىقپالى بولدى. ءسوز سوڭىندا, «ادىرنا» بىرلەستىگىنە ءۇمىت ارتىپ, اراشا سۇراعان بارشا اعايىنعا, باحارگۇل حانىم مەن ەكى ەل اراسىندا بەيبىت كەلىسىمگە كەلىپ, جۇيەلى جۇمىس جاساعان «جەبەۋ» ۇيىمىنا دا العىس بىلدىرگەندى ءجون كورىپ وتىرمىز. كوش كولىكتى بولسىن اعايىن!

ماقالانىڭ تولىق نۇسقاسىن تومەندەگى سىلتەمەدەن وقي الاسىزدار.
http://jebeu.kz/e/action/ShowInfo.php?classid=5&id=1244&fbclid=IwAR1VebYN6P6qxg6fPg-WLizJdsDElQX-SInRtTDYqd28OKlwQmuA39I9C2Q