Jańalyqtar
Balasy jetimder úıinen, ózderi saıası lagerden aman qalǵan otbasy
Qyrkúıek aıynda jarııalaǵan myna bir maqalamyzda Berzat Jumaǵazy esimdi jas otbasynyń Qazaqstanǵa zańdy kelip, jyldar óte túrli sebeptermen qujatsyz tentirep ketkeni týraly jazyp edik. Jazyp qana qoımaı, mán-jaıdy kózben kórip, «qur» ýáde berip te attanǵanbyz. Abyroı bolǵanda, ýádemiz Respýblıkalyq «Jebeý» uıymynyń aralasýymen kúni keshe oń sheshimin tapty. Bul qýanyshty atalǵan uıymnyń saıty birinshi bolyp habarlady.
Alaıda bul Berzat otbasyn tolyq qandy QR azamaty boldy degendi bildirmeıdi. Kerisinshe Qytaı Halyq Respýblıkasynyń sý jańa qyzyl pasporty qolǵa tıdi degen sóz. Biraq, munyń ózine shúkirlik etýge, súıinshi suraýǵa týra kelip tur. Sebebi B.Jumaǵazynyń otbasyndaǵy buǵan deıingi barlyq qujattarynyń ýaqyty ótip, zańdyq turǵydan múldem jaramsyz kúıge túsken-di. Zańǵa salsańyz Qytaı asyp keri qaıtýdan basqa láj joq tuǵyn. Dál osy tyǵyryqtan aman shyqqanynyń ózi – bir olja. Aldaǵy ýaqytta qujattaryn aman-esen qolyna alǵan Berzat otbasynyń QR azamaty ataný túkte qıyn sharýa emes. Ári ketse jarty jylda Qazaqstannyń tólqujattaryn qoldaryna ala alatyn bolady. Qarııalar mundaıdy: «Istiń beti ońǵa buryldy» – deýshi edi. Ońǵa burylmaı qaıtsin, barlyq másele oń sheshimin taýyp jatsa…
Erekshe aıta keter bir jaı bar. Negizi Berzat Shyǵys Qazaqstan óńirinde turaqty mekendegen. Qujattarynyń da ýaqyty sonda ótken. Tipti, Qazaqstanda dúnıege kelgen balalary jetimder úıine tapsyrylyp, ózderi Qytaıǵa qýylý qaýpi tónip turǵan tusta, qoǵam belsendisi, qandastar arasynda qor quryp, qaıyrymdylyq is-sharasymen aınalysyp júrgen – Bahargúl Tabysqyzy esimdi azamatsha arasha túsedi. Shyǵystan aldyryp, páterin jaldap, aılyq iship-jemin de aıyryp beredi. Tipti, «Adyrna» birlestiginiń aralasýyna, BAQ betine Berzat otbasynyń máselesi kóterilýine deıin osy azamatshanyń tikeleı yqpaly boldy. Sóz sońynda, «Adyrna» birlestigine úmit artyp, arasha suraǵan barsha aǵaıynǵa, Bahargúl hanym men eki el arasynda beıbit kelisimge kelip, júıeli jumys jasaǵan «Jebeý» uıymyna da alǵys bildirgendi jón kórip otyrmyz. Kósh kólikti bolsyn aǵaıyn!
Maqalanyń tolyq nusqasyn tómendegi siltemeden oqı alasyzdar.
http://jebeu.kz/e/action/ShowInfo.php?classid=5&id=1244&fbclid=IwAR1VebYN6P6qxg6fPg-WLizJdsDElQX-SInRtTDYqd28OKlwQmuA39I9C2Q
