جاڭالىقتار
بالاسىن اياق كيىمى كىر بولعانى ءۇشىن ۇرعان: كوكشەتاۋلىق انا اتا-انالىق قۇقىعىنان ايىرىلدى
كوكشەتاۋ قالالىق سوتى قالا تۇرعىنىن ءوز بالاسىنا قاتىگەزدىك كورسەتكەنى ءۇشىن كىنالى دەپ تانىدى, دەپ حابارلايدى Qandastar.kz.
تەرگەۋ بارىسىندا ايەلدىڭ 9 جاسار قىزىن جۇيەلى تۇردە ۇرىپ-سوققانى جانە ونى تاربيەلەۋدەن ءىس جۇزىندە باس تارتقانى انىقتالدى.
اناسى ماس بولىپ, قىزىن مەكتەپتەن كىر اياق كيىممەن كەلگەنى ءۇشىن ۇرىپ-سوققان. مەديتسينالىق تەكسەرۋ بارىسىندا بالانىڭ دەنە جاراقاتتارى تىركەلدى.
قامقورشىلىق ورگاندارى ايەلدىڭ اتا-انالىق مىندەتتەرىن ۇزاق ۋاقىت بويى ورىنداماعانىن انىقتادى, ناتيجەسىندە سوت ونى اتا-انا قۇقىعىنان ايىرۋ تۋرالى شەشىم قابىلدادى. سونىمەن قاتار ول 100 ساعات قوعامدىق جۇمىسقا تارتۋ جازاسىنا كەسىلدى. ۇكىم ءالى زاڭدى كۇشىنە ەنگەن جوق.
اقمولا وبلىسىنىڭ پروكۋراتۋراسى وتباسى, انالىق, اكەلىك جانە بالالىق مەملەكەتتىڭ ەرەكشە قورعاۋىندا ەكەنىن جانە وتباسىلىق-تۇرمىستىق سالاداعى كەز كەلگەن زورلىق-زومبىلىق ارەكەتتەرى اكىمشىلىك جانە قىلمىستىق جاۋاپكەرشىلىككە اكەلەتىنىن ەسكە سالادى.
