Balasyn aıaq kıimi kir bolǵany úshin urǵan: Kókshetaýlyq ana ata-analyq quqyǵynan aıyryldy

Kókshetaý qalalyq soty qala turǵynyn óz balasyna qatygezdik kórsetkeni úshin kináli dep tanydy, dep habarlaıdy Qandastar.kz.

Tergeý barysynda áıeldiń 9 jasar qyzyn júıeli túrde uryp-soqqany jáne ony tárbıeleýden is júzinde bas tartqany anyqtaldy.

Anasy mas bolyp, qyzyn mektepten kir aıaq kıimmen kelgeni úshin uryp-soqqan. Medıınalyq tekserý barysynda balanyń dene jaraqattary tirkeldi.

Qamqorshylyq organdary áıeldiń ata-analyq mindetterin uzaq ýaqyt boıy oryndamaǵanyn anyqtady, nátıjesinde sot ony ata-ana quqyǵynan aıyrý týraly sheshim qabyldady. Sonymen qatar ol 100 saǵat qoǵamdyq jumysqa tartý jazasyna kesildi. Úkim áli zańdy kúshine engen joq.

Aqmola oblysynyń prokýratýrasy otbasy, analyq, ákelik jáne balalyq memlekettiń erekshe qorǵaýynda ekenin jáne otbasylyq-turmystyq saladaǵy kez kelgen zorlyq-zombylyq áreketteri ákimshilik jáne qylmystyq jaýapkershilikke ákeletinin eske salady.