«بالكوننان تومەن سالبىراتىپ, ومىرىنە قاۋىپ توندىرگەن». جەلىدە اكەسىنىڭ تۋعان قىزىن «جەلبىرەتكەنىنە» قاتىستى كادر تارادى

باتىس قازاقستان وبلىسىندا پوليتسيا قىزمەتكەرلەرى ەر ادامنىڭ كىشكەنتاي قىزدى قولىنان ۇستاپ, بالكوننان تومەن ءتۇسىرىپ جاتقان ءساتى بەينەلەنگەن جازبانى انىقتاعان, دەپ حابارلايدى qandastar.kz

جانتۇرشىگەرلىك ۆيدەو 17 شىلدەدە zhaloba_uralsk_official پاراقشاسىندا جاريالانعان. قۇقىق قورعاۋ ورگاندارى ەر ادامنىڭ جەكە باسىن دەرەۋ انىقتاعان, ول بالانىڭ تۋعان اكەسى بولىپ شىقتى. بۇل جايلى Massaget «نادەجدا» گازەتىنە سىلتەمە جاساپ جازدى.

«ونىمەن پروفيلاكتيكالىق اڭگىمە جۇرگىزىلدى, قازىر زاڭناماعا سايكەس جاۋاپكەرشىلىككە تارتۋ ماسەلەسى قاراستىرىلىپ جاتىر. ەسكەرتە كەتەيىك, بالانىڭ ءومىرى مەن دەنساۋلىعىنا قاۋىپ توندىرەتىن كەز كەلگەن ارەكەت ورنى تولماس قايعىعا اكەلۋى مۇمكىن. اتا-انالاردى مۇقيات بولۋعا جانە مۇنداي قاۋىپتى ءارى جاۋاپسىز قىلىقتارعا جول بەرمەۋگە شاقىرامىز», – دەلىنگەن وبلىستىق پوليتسيانىڭ رەسمي حابارلاماسىندا.

بۇل وقيعاعا بقو-داعى بالا قۇقىقتارى جونىندەگى ۋاكىل شاتتىق ۇتەباليەۆا دا پىكىر ءبىلدىردى. ونىڭ ايتۋىنشا, بۇل جاعداي اسا ۇلكەن الاڭداۋشىلىق تۋدىرىپ وتىر. اتا-انانىڭ مۇنداي ارەكەتى — جاي عانا ورىنسىز ارەكەت ەمەس, بالانىڭ ءومىرى مەن دەنساۋلىعىنا توندىرگەن قاۋىپ.

«ەرەسەك ادامنىڭ نيەتى قانداي بولسا دا, ويناۋ, جازالاۋ نە كۇش كورسەتۋ ارەكەتى بولسىن, مۇنداي جاعداي مۇلدە دۇرىس ەمەس. بالا قاۋىپسىز ءارى قورعالعان ورتادا وسۋگە ءتيىس. ال اتا-انا سول قاۋىپسىزدىكتىڭ باستى كەپىلى بولۋى كەرەك», – دەدى شاتتىق ساماتقىزى.

بيلىك وكىلدەرى مۇنداي جايتتارعا قوعامنىڭ بەي-جاي قاراماۋىن سۇرايدى. بالالاردى تاربيەلەۋمەن قاتار, ولاردى قورعاۋ — ءاربىر ەرەسەك ادامنىڭ مىندەتى.