قارجى جانە تولەمدەر
بانك قىزمەتكەرى كليەنتتەردىڭ اتىنان 60 ميلليون راسىمدەگەن
فوتو: اشىق دەرەككوز
بانك قىزمەتكەرى كليەنتتەردىڭ اتىنان جالپى 60 ميلليون تەڭگە كولەمىندە نەسيە راسىمدەپ, اقشانى دوستارىنا جىبەرگەن, – دەپ حابارلايدى qandastar.kz.
قازاقستاننىڭ باس پروكۋراتۋراسى اسا ءىرى الاياقتىق جاسادى دەگەن تاعى ءبىر كۇدىكتىنى رەسەيدەن ەكستراديتسيالادى.
ۆەدومستۆونىڭ مالىمەتىنشە, كۇدىكتى 2019-2022 جىلدار ارالىعىندا تاراز قالاسىنداعى بانك فيليالىنىڭ قىزمەتكەرى بولىپ جۇمىس ىستەگەن. ءسويتىپ بانك كليەنتتەرىنىڭ اتىنان نەسيە راسىمدەگەن.
«بانك كليەنتتەرىنىڭ شوتتارىنا قول جەتكىزگەن كۇدىكتى قاراجاتتى دوستارىنىڭ ەسەپشوتىنا اۋدارىپ, كەيىن ونى قولما-قول اقشاعا اينالدىرعان. قىلمىستىق ارەكەتتەر ناتيجەسىندە بانك كليەنتتەرىنە 60 ميلليون تەڭگە كولەمىندە زالال كەلتىرگەنى بەلگىلى بولدى. قىلمىس جاساعاننان كەيىن كۇدىكتى جاسىرىنىپ, وعان حالىقارالىق ىزدەۋ جاريالاندى», – دەلىنگەن حابارلامادا.
كۇدىكتى بيىل ءساۋىر ايىندا كراسنودار ولكەسىنىڭ اۋماعىندا ۇستالدى. ءسويتىپ ەلىمىزدىڭ باس پروكۋراتۋراسىنىڭ سۇراۋىمەن قازاقستانعا ەكستراديتسيالاندى. قازىر كۇدىكتى ۋاقىتشا ۇستاۋ يزولياتورىنا قامالدى.
قىلمىس ءۇشىن ونىڭ مۇلكى تاركىلەندى. كۇدىكتى بەس جىلدان ون جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
