Bapkerin qushaqtap, ókirip jylaǵan dzıýdoshy japon qyzǵa qatysty tyń aqparat belgili boldy

Sýret: vıdeodan alyndy

Áleýmettik jelide bapkerin qushaqtap, ókirip qatty jylaǵan sportshy japon qyzdyń vıdeosy qyzý talqylanyp jatyr. Pikir qaldyrýshylardyń biri onyń jaqyn adamy dúnıeden qaıtqanyn jazǵan. Alaıda bul málimet rastalmady, dep habarlaıdy Zakon.kz.

Vıdeodaǵy sportshy qyz – dzıýdodan álemniń tórt dúrkin chempıony, japonııalyq sportshy Ýta Abe. Onyń esimi ańyzǵa aınalyp úlgergen. Ol eshbir qarsylasqa jol bermeıtin №1 dzıýdoshy retinde tanymal. Mine, osyndaı myqty osy Olımpıadada ózbek balýany Dııora Keldııorovadan jeńilip, jarys jolynan shyǵyp qaldy. Sol kezde ol qatty jylap, ókinishten ózegi órtenip, ókirip, bapkerin qushaqtap turyp alady. Ony arenadan súırep alyp ketýge týra keledi.

Negizi, 2020 jylǵy Tokıoda ótken Olımpıada oıyndarynda Ýta aǵasy ekeýi birdeı altyn medal ıelengen edi. Olar Parıjde osy kórsetkishti qaıtalaýdy maqsat etip kelgen eken.

Kóp uzamaı Ýta Abeniń týǵan aǵasy Hıfýmı Abe dzıýdodan Parıj Olımpıadasynyń altyn medalyn enshiledi. Esterińizde bolsa, osy salmaqta qazaq balýany Ǵusman Qyrǵyzbaev qola medal alǵan bolatyn. Keıin jýrnalısterge bergen suqbatynda altyn medal ıegeri Hıfýmı Abe:

«Qaryndasym jeńilip qalyp, qatty jylady. Ony kórip qatty qınaldym. Sol úshin de barymdy salyp, eki dúrkin Olımpıada chempıony bolamyn dep sheshtim. Chempıon bolyp, ony jubatqym keldi. Sondaı maqsatta tatamıge shyqtym».