«بارلىق جاعدايىمىزدى جاساپ جاتىر»: شىمكەنتتەگى قارتتار ۇيىندە ەكى زەينەتكەر شاڭىراق كوتەردى

شىمكەنتتە 70-كە جۋىق قاريا قارتتار ۇيىندە تۇرىپ جاتىر. قاريالاردىڭ ءبىرى راحىمقۇل سمادياروۆتىڭ قارتتار ۇيىنە ورنالاسقانىنا ءبىر جىلدان اسقان. ونىڭ ايتۋىنشا, مۇندا كەلگەلى دەنساۋلىعى ءبىرشاما جاقسارعان. وسىندا ەكىنشى جارتىسىن تاۋىپ, وتاۋ قۇرىپتى, دەپ حابارلايدى qandastar.kz اقپارات پورتالى Ontustik TV تەلەارناسىنا سىلتەمە جاساپ.

«باسشىمىزعا, قىزمەتكەرلەرگە, مەدبيكەلەرگە, اسپازدارعا العىس ايتامىن. بارلىق جاعدايىمىزدى جاساپ جاتىر, جاقسى قارايدى», – دەدى راحىمقۇل سمادياروۆ.

بۇل قارتتار ۇيىندە 68 قاريا بار. ولارعا جەتى باعىت بويىنشا 64 ادام قىزمەت كورسەتەدى.

«مۇمكىندىگىنشە بۇل كىسىلەردىڭ زەرىكپەۋى ءۇشىن جۇمىستار جۇرگىزىلىپ وتىرادى. اجەلەر توقىمامەن اينالىساتىن بولسا, اتالارىمىز سىرتتاعى گۇلدەرىمىزدى باپتاپ, اعاشتارعا كۇتىم جاسايدى. مەديتسينا قىزمەتكەلەرى اتا-اپالارىمىزدىڭ دەنساۋلىعىن جاقسارتىپ, بىرقالىپتى ۇستاپ وتىرۋعا بار كۇشىن سالىپ جاتىر», – دەيدى الەۋمەتتىك قىزمەتكەر بالشەكەر سۇلتانبەكقىزى.

قارتتار ۇيىنەن پانا تاپقانداردىڭ اراسىندا ءبىرىنشى جانە ەكىنشى ساناتتاعى مۇگەدەك جاندار دا بار. ولارعا ستاتسيونارلىق جاعدايدا كومەك بەرىلۋ بارىسىندا كەيبىرى قولارباسىن تاستاپ, اياققا تۇرىپتى.