«بارىس» وردەنىن العان نۇرلان ونەرباەۆ زەينەتكە شىعاتىنىن ايتتى

فوتو: ۆيدەودان كادر نۇرلان ونەرباەۆ پرەزيدەنت قولىنان العان ءى دارەجەلى «بارىس» وردەنىن العان سوڭ قانداي اسەردە بولعانىن ايتىپ بەردى, دەپ حابارلايدى qandastar.kz El.kzاقپارات اگەنتتىگىنە سىلتەمە جاساپ.

قاتتى تولقۋ ۇستىندە بولدىم دەپ ايتا المايمىن. ءبىر جاعىنان كۇتپەگەن جاعداي. شىن ايتسا, ءدال وسىنداي ماراپات بولادى دەپ كۇتكەن جوقپىن. ۇيعارعان ەكەن, لايىقتى دەپ تاپقان ەكەن. ون كۇننەن كەيىن جاسىم 63-كە تولىپ, زەينەتكە شىعامىن. ونەردىڭ تابالدىرىعن اتتاعانىما 46 جىل بولادى ەكەن. 46 جىل ارتتا قالعاندا ونەرىمە, شىعارماشىلىعىما شابىت بەرەتىن وسىنداي ۇستەمە جاسايدى دەپ كۇتكەن جوقپىن. ماراپات بولاتىنىن حابارلادى. بىراق ناقتى قانداي بولاتىنىن ايتپادى, – دەدى ءانشى «تاڭشولپان» باعدارلاماسىنا بەرگەن سۇحباتىندا.

سونىمەن قاتار ونەرباەۆ مۇنداي جەتىستىككە كومپوزيتورلار مەن تىڭدارمانداردىڭ ارقاسىندا جەتكەنىن ايتىپ, ولارعا العىسىن ءبىلدىردى.

ونەر تابالدىرىعىن 1978 جىلى اتتادىم. سودان بەرى ەل الدىنا شىعىپ, ورىنداپ جۇرگەن اندەرىم تىڭدارمانداردىڭ جۇرەگىنە جەتىپ, كوڭىلىنىڭ تورىنەن ورىن العان اندەر دەپ ايتسام قاتەلەسپەيتىن شىعارمىن. مەن كەشە وسى ماراپاتتى الىپ تۇرىپ, ءوزىمنىڭ ىشكى ويىم ءبىرىنشى كەزەكتە مەنىڭ اۆتورلارىم مەن كومپوزيتورلارىمدا بولدى. وسى جىلداردا ەلگە سۇيكىمىمدى ارتتىرعان, مەنى تانىمال ەتكەن, كورەرمەننىڭ كوڭىلىنە كوتەرگەن ەڭ تاماشا, قاناتتى, سۇلۋ اندەردى ۇسىنعان ەكەن ماعان. كەشە ومىردەن ءوتىپ كەتكەن كومپوزيتورلار, بۇگىندە ورتامىزدا جۇرگەندەر دە بار. ءبىرىنشى كەزەكتە سولارعا العىسىمدى ايتامىن. ەكىنشىدەن, مەنىڭ تىڭدارماندارىمنىڭ ارقاسى. وسى ماراپتتار دا, ەل الدىندا وسىلاي ەركەلەپ ءجۇرۋىمىز دە سولاردىڭ ىستىق ىقىلاسى, قوشەمەتى, ماحابباتى, – دەدى ونەرباەۆ.